2011-12-17 尋找靚腩的故事 (上集)

在某飲食討論區看到有此留言：「九記牛腩，靚絕全港」。對不起，朕絕不同意！每次到訪「九記牛腩」都是叫乜部位無乜部位，牛腩又瘦又鞋 (可能本人不是熟客，所以得不到靚部位)，湯太鹹，伊麺底太硬，唯一可取的是咖喱汁 (但與牛腩無關呀。。。）；加上又要排餐懞，所以朕早已甚少踏足歌賦街。

說真，清湯腩人人食過，但唔係人人識得分。朕通常喜歡叫「崩沙腩」或「爽腩」，它是牛肚皮的腩位，面積小及有塊薄軟膠質，爽軟而不硬，極品。若沒有「崩沙腩」，退而求其次的選擇則是「坑腩」，即牛胸前八支骨的部位，肉是三分肥七分瘦，雖則沒有軟膠質，牛味卻最濃，且通常平過「崩沙腩」，吃得過。若連「坑腩」都賣哂？咁乾脆轉叫魚旦牛丸之類算數，無謂硬要肚皮受罪。

作為一為牛痴，朕吃過不少靚腩，其中一間最想一試其滋味的就是大埔「群記清湯腩」，每次看到雜誌或食評介紹她的「崩沙腩」都會不禁讚嘆牛牛果然是人類胃部最好的朋友。可惜大埔實在太遠喇，要搵日專誠入去潮拜，實在要點決心。

以下幾間牛腩店，有出名有隱蔽，算是本人少少的心水，可供大家參考一下。

牛腩一號 - 華姐清湯腩

「華姐」位於天后，名字與地點非常搭配，因為她的確是天后級的清湯腩！不論堂食與外賣，門外都大排長龍，唔係講笑。

印象中「華姐」這街坊小店與「大利清湯腩」也有點關係，應是以前的舊合作伙伴，後來因意見不合而分家，看來合久必分這定律不無道理。

「清湯爽腩河」($30)

白色的絕不是肥膏，而是牛的軟膠質！軟膠炆得入口淋滑，肉質有嚼頭，腍中帶爽，河粉亦爽滑細緻。值得一讚的是那用牛骨熬出來的清湯，顏色清澈，牛的鮮味是超清甜，絕對是整碗粉的靈魂。溫馨提示，若想湯頭再濃稠一點，可以在落 order 時搭一句「加腩汁」，包保連湯底也一滴不漏喝得光光！

「腩汁蘿蔔 」($10)

用清湯牛腩汁去炆的蘿蔔，不算太入味，卻有一絲天然的清甜，沒有坊間一般用冰糖炆蘿蔔的死甜或苦澀味，加上口感無渣，甜美清潤，用來配襯清湯腩，吃完不羡仙。

最後值得一讚的是店員服務態度，有禮之餘收拾碗碟時亦十分小心，完全顧及客人的感受。天后級，當之無愧。

明天會有牛腩二號至五號陸續登場。See you tomorrow !

「華姐清湯腩」

地址 : 天后電氣道13號A地下

電話 : 2807 0181