2011-12-13 隱姑茶果

看到最新一期的「飲食男女」介紹客家菜，當中提及到客家茶粿，令本少爺手癢癢也要寫一下幾個月前吃過的大澳茶粿。

茶粿查實是類似糯米糍的傳統客家小食，主要是糯米粉團再包入餡料，有鹹有甜，眉豆芝麻紅豆花生豬肉蝦米菇粒，真係包乜都得。唔知第時會唔會發展到會包麥提莎、奶黃、榴蓮等 fusion 口味呢？

咁「茶果嶺」又同「茶粿」有無關係呢？係有啲。原來以前住在茶果嶺的大多數是客家人，地方則因山上長有大量茶果樹而得名 (茶果樹的樹葉就是每次蒸茶粿時需要的材料)。今時今日的茶果嶺已變得大廈林立，要找好吃的傳統風味茶粿，還是入大澳吧！

「隱姑茶果」位於大澳大街，茶粿不斷一籠籠的亮相，勝在流量多夠新鮮。

點了個鹹的眉豆花生餡，熱辣辣，皮軟滑而有彈性，軟韌度剛剛好，餡料味道則有點兒似裹蒸粽，很不錯吃。

另一款雞屎藤茶粿，帶有清新草香，又有清熱解毒之效。

再配支冰凍酸甜的紫貝天葵茶，清熱消暑，健康過飲汽水啦。

這位「隱姑」雖然是遙遠了一點，但要尋找美食，有時「搵食行遠啲」，都在所不惜啦！