2012-03-10 桌墊上的老照片 - Peak Café

若你識得「老襯亭」呢個名，証明你人生閱歷都有番咁上下。。。

「老襯亭」，即時現在山頂「凌宵閣」的前身。

記得小時候與屋企人坐覽車上山頂玩，絕對是件大件事，事前要做足準備工夫；例如會預早一日煮定滷水蛋滷水雞翼帶去野餐啦，又要買定幾筒36張的菲林帶去影相，仲要求神拜佛千萬不要下雨，否則去唔成就會中空寶。另一樣最印象深刻的就是那些亭內的望遠鏡，部部都是壞的，入了錢後都係乜都睇唔到；有無人有同感？

現在要上山頂食飯，只要帶三樣嘢就得，就是 iPhone、信用咭、八達通。如果可以帶第四樣，你會㨂帶乜呢？唔。。。我會揀帶 iPhone 後備電，都唔會㨂帶錢，因為 iPhone 無電的那種感覺實在太可怕了。原來現代人的安全感，就是來自一部電話。。。

記得中學會考那年的暑假，好像是「山頂廣場」剛開幕左右吧，我們一班同學在等放榜的前席，齊齊上山頂傾心事，講理想，玩到又濕身又瞓地。

除了柯震東同陳妍希，我們每人都也曾年輕過啊。細心一數，有幾多位老朋友現在還有聯絡呢？全部有 facebook，無 contact。大家生活過得好嗎？

如無記錯的話，位於中環蘇豪的「Peak Café」，就是山頂那間「山頂餐廳」在山頂外的第一間分店，它也變成了朕其中一間飯堂。現在該集團已在港九，甚至機場開了不少餐廳。

「Buffalo Mozzarella , Tomato and Basil Salad」$138

很簡單的一道頭盤，番茄是吃得出的鮮活，Mozzarella cheese 夠凍，這樣就已成功了一大半。喜愛它下了 basil，令食材在甜醋味道中添了幾分清香細膩，香氣流連齒頰，很高章。

「Peak Café Snack Combo」$138

左起：蔥油薄餅、雞翼、炸魷魚、咖喱角、燒小豬脾骨，賣相絕不馬虎。

朕最喜愛的是炸魷魚圈，弄得外層焦脆，內裡肉質彈牙，蘸點番茄 sasa 醬吃很匹配。另外豬仔骨也是另一送酒極品，點薄荷醬味道會有驚喜。

想知朕邊年會考？我依稀記得當年「十大勁歌金曲」的「最受歡迎男新人」就是今年的「最受歡迎男歌星」- 古巨基。自己估啦！

「山頂餐廳酒吧」

地址 : 中環蘇豪些利街9-13號

電話 : 2140 6877

若你喜歡此文，也請你到 facebook 專頁 like 一 like，感激！ https://www.facebook.com/pages/為-食-龍-少-爺/198211286900730?