早前放農曆年假，在網上看到一則有趣的調查，調查了網友在嗌外賣回家吃時發生過最中伏的事。以下是幾個經典例子：
網友 A 個案：落街買鳳爪排骨飯，返到屋企開餐先發現阿叔落錯普洱當豉油。
( 龍少爺：呢位兄台有所不知，阿叔用心良苦呀，「茶漬飯」查實對健康是非常有益。臨床實驗顯示，普洱有解油膩及降胆固醇之效，今次明益你啦。)
網友 B 個案：外賣凍飲，紙杯邊有外賣阿嬸個脣膏印，都唔知仲飲唔飲杯嘢好。
( 龍少爺：早前 o靚模 DaDa 在大陸登台賣唇印紙巾，令眾宅男爭崩頭，最後以 $12,000 人仔天價成交，而家阿嬸免費附送，又係明益你啦。)
網友 C 個案：在大快活買魚柳飯，返到公司打開，得盒白飯，搞到又要行15分鐘返大快活同佢理論。。。
網友 D 個案：外賣「老麥」十八件麥樂雞，諗住試勻四隻醬，點知攞返屋企打開，漏咗俾醬。。。
其餘千奇百怪的囧事，多不勝數。
鄙人最經典的外賣中伏事是叫了碗叉燒湯米返公司食 ，正常係一碗湯、一碗米，點知佢比咗兩碗都係湯，返到公司超想媽叉。。。
早前叫外賣「叉雞米」返屋企食，好彩，無事！
奉勸各位以後叫外賣時，記得 check 清楚先好走喇！
沒有留言:
發佈留言