上篇就分享了中午外賣，有朋友看完說我很 dry。。。都係㗎，口味方面！今集搜羅一堆之前平時會出外堂食的花絮點滴，應該會無咁 dry 喇啩！XD
其實從小到大我吃飯都是喜歡「快食快閃」的人，有些尷尬品嚐那些上菜很慢，又要吃得很慢的所謂「儀式感」，「澳牛」的速度其實我蠻喜歡的，哈！可能我個人比較心急慣了9 秒9，工作 trained 到我盡快完成件事 (是任何事情)。橫掂上班中午吃飯都是有限時間，出外唞唞氣有時也不錯，都時以快靚正和標準。至於以下做唔做到呢個標準？又即管睇睇。
先講吓我們香港特色之一：茶餐廳，都食過無數間，這個「俄羅斯什菌焗牛仔柳飯」配紅湯及熱奶茶 HK$73
「焗」總是會將平凡的食材變得不一樣而覺得有更好吃：
這個真心講焗得不錯，汁底味道有些焗豬扒飯的蕃茄汁，還不錯，芝士也吃得足：
可惜牛柳太熟，十分韌，咁呢啲都係撞手神，所以可能有個金科玉律，去茶餐廳叫焗飯焗意粉盡量不要叫牛那一類，叫豬扒或者肉醬意粉等等相對會穩陣得多：
還是杯熱奶茶最好飲：
這間茶記沒記錯應該是在九龍灣，「黯然銷魂飯」配熱齋啡 HK$60
碟飯個賣相肯定同我 FF 有落差，擺盤十分求其，兩隻太陽蛋沒燶邊，叉燒份量也少得可憐：
唯有自我調整心態，有我最喜愛的煎太陽蛋，都算垂涎欲滴，用蛋汁豉油汁撈飯還好：
另一間茶餐廳的「蔥油鹽焗雞髀飯」，價錢忘記了，真係隔住個 mon 都覺得佢乾同唔掂，完全唔想食。。。
所以下次醒目咗，點佢出前一丁餐，有煎太陽蛋同一小塊雞扒，總不會差到哪裏：
講起食麵，原來發現手機上和同事一起去「沾仔記」的次數也頗多，我個人麻麻，HK$40 一碗又貴湯底又差，同事就覺得好食，咁我都會就佢哋一齊去食，離不開都係勁大粒雲吞同埋被鬆肉粉揦到無晒質感嘅牛肉：
真心覺得可取係「沾仔記」的辣椒油，呢個反而我覺得若果是佢自己出品的話就做得不錯，香辣又不會太鹹，有時我懷疑我去主要都係食佢嘅辣椒油。。。
講起粉麵，不如講吓米線，「譚仔」同埋「譚仔三哥」除了外賣回公司吃，有時小人也會堂吃，唔知點解食親「譚仔」我都係鍾意食佢哋嘅素食系列，食嗰個乜乜「羅漢齋素卷」，同埋「新鮮淮山」，都係我心水的配料選擇：
至於以下呢間位於中環近投注站的米線店，不開名啦，係劣到一個點！呢碗「豬扒米線」賣相衰，味道同樣也沒有好，我和同事們一致已 black list 此店 :
至於菜式類別方面，有時出外吃台灣菜式，我自己都會挑「台灣牛肉麵」，這兩間在中環的，第一間「半筋半肉」炆得好，湯頭也對板，有做到快靚正：
第二間湯和麵稍為遜色，不過整體牛肉都炆得入味軟腍，也對我胃口：
其他粉麵舖頭也是經常會吃到，我離不開到時會吃牛腩、水餃、牛筋等等，下面頭一張是在尖沙咀吃到的崩沙腩，好掂！不過店名真係忘記咗沒有記低 😅
講到打工仔出外食午餐，又點少得燒味店呢？我通常都會選擇「半肥瘦叉」、有時「切雞」、「油雞」、有時「偽 • 海南雞飯」，看心情和胃口想吃肥膩一些還是清爽一些，今時今日中午吃個燒味乜乜連飲品都起碼要 HK$70 左右啊：
中午祭五臟廟，連鎖快餐店也是經常會吃到，我個人通常都是幫襯「大快活」。作為一為牛痴，若想不到吃什麼就多數點「咖喱牛腩」，總不會差到哪裏：
其實我幾喜歡「大快活」選擇比較多元化，出品也不太差，潮流興多花款嘛。例如最近吃這個所謂「Gym L」餐在網上甚多好評，受愛好健身的朋友仔歡迎，佢個雞胸肉的確不韌，連我一吃不喜歡吃雞胸都覺得味道不錯，配糙米五穀飯及一碗無味精湯，整體吃飽後覺得心態仍良好沒罪惡感 XD
這個「蝦醬豬頸肉煲仔飯」都好吃，有生菜、花生雞腳湯，飯我肯定食唔晒，整體都食開心嘅：
有時就腳同埋同事唔想行太遠，間唔中都會去「大快活」嘅對手，另一間「大」字頭，我只吃「焗豬扒飯」(加太陽蛋)：
試過跟同事吃其他都出出地事。。。印象最深刻有個「鮑魚仔乜乜燴飯」，完全無味的。。。
最後推介一個早餐俾大家，在中環威靈頓街，佢個 set 有「薑絲豬膶麵」加炒滑蛋多士同熱奶茶 HK$40，份量沒很大，早餐剛剛好，也好吃：
第十八集來到呢度，希望大家今次覺得無咁dry，同埋感受到我平日若果沒有 business lunch 的話一些午飯點滴。這個系列下集再傾！
沒有留言:
發佈留言