又來分享一些家常小菜，簡簡單單最滋味。
第一味「南乳蒸排骨」，真係好味到可以連送兩碗飯。
首先去街市豬肉檔，問「豬肉榮」買 $30 腩排，叫佢斬開。之前有讀者在 FB 上話煮肉唔夠鬆軟入味，我的秘訣就是用可樂去醃肉，豬肉雞肉都得，因為可樂的成份可以鬆軟肉質。排骨加可樂浸 20分鐘，然後拎起、抺乾，再落南乳 (記得試味)、生粉、糖同少許麻油略醃，隔水蒸 15分鐘就食到鬆軟排骨。大家唔使擔心排骨會有可樂味，因為南乳味道是會蓋過汽水味，大家不妨試試。
另一樣是「砂鍋粉絲素雞」，一個全素好像很平淡的餸菜。
粉絲先用水浸諗。放薑片、素雞和油在燒紅的瓦罉內爆香，好味的秘訣是要灒一些味醂爆一爆，落咗味醂會香好多！
再將一盒 250ml 雞湯倒入，加清水至滾起，放入洗好及切段的娃娃菜滾兩分鐘至大半腍，再放粉絲滾多分半鐘，用魚露調味後就食得。
薑片的作用是用來擗娃娃菜的草青味及提香，煮出來是不會有太濃的薑味，怕薑人士不用擔心味道不對辦。
最後煲個簡單的湯－「腰果紅棗雞腳瘦肉湯」，用腰果煲湯的效果會很有肉甜，不吃紅肉的朋友可以不放瘦肉，多放腰果代替。而且腰果可補充蛋白質及健脾補腎，多吃有益。
有朋友話煲雞腳湯會很油，秘訣又係很簡單，就係煲湯時唔好斬去腳趾，雞油就唔會出晒嚟，可以減少八成；到煲好之後，如果想食雞腳又嫌腳指肉酸，可以在完成後才剪掉雞腳指甲，又搞掂。