合作企劃

2019年1月12日星期六

快遊台北 (一) 一年去四次做乜?/ 我在台北之日常


係,早前聖誕,我又去咗轉台北。




本來年尾無諗住飛,點知舊年在某酒店的冬至飯局,食友 P 兄語重深長地說:「龍少,有假期就飛去外地睇吓嗰世界啦!(我心諗:我12月先去完美國,1月泰國,年中去左三次台北囉喎。。。) 要見識多啲先得㗎...」下刪二百字。。。咁 P 兄都講得啱,俾佢講到心郁郁。在無準備及一日前訂機票的情況下,毫不猶豫就揀了台北。



又係台北?因為對這地方太熟悉,乜都唔使煩唔使 plan,想飛就飛,某程度上是等於真正「休息」。我留在香港就算放假,都係瞓得唔好,亳無 relax 感。





分享一下這幾天在那𥚃的生活,其實應該拍 vlog 擺上 YouTube 啊 XD  

聖誕節 25號早機,在香港機場,先吃早餐。唔想去 Lounge,同埋無乜時間,就直入閘。Food Court 正在裝修,沙塵滾滾,嘢食仲係好貴,甚麼拉麵餐也要 HK$120,朝早喎。最後要了一碗「莆田」迷你雲吞 HK$82



真心貴,同埋唔好食。其實機場係俾來 / 離港遊客,轉機或飛其他地方的觀感印象,食物可唔可以唔好咁掠水呢???

(溫提,「麥記」搬咗出嚟,在入閘前的平台上。想食早餐平DD,記得要在入閘前。)

在台北,我都是住西門町同一間酒店 (相關舊文),住慣住熟,活動範圍也離不開西門町。最緊要係張床夠舒服,每天瞓到黃朝百晏,自然醒,先感覺到是真休息。



起身,通常會先睇陣電視。其實當地電視節目都係重播又重播些綜藝節目或電視劇,卻就總是有股魅力令你看下去也不覺悶蛋,有時自己笑吓都幾好。



在當地,通常我不會四處奔走遊覽景點,幾乎主要景點都到過。我會像日常生活,做一些在香港冇乜幾可做的事,例如睇戲:



行藥妝,我會買甚麼「休足時間」、「熊寶貝」噴霧:




看似很無聊,但係呢啲喺香港我係好少有心機特登去買,去旅行就會有呢份所謂閑情逸致。

話時話,買「熊寶貝」用來做手信的確唔錯,一來香港無,又實用,二來易拎,三來也不貴,平均一支才 TW$80,呢個堅推薦:



食嘢方面,一個人行到邊食到邊。我比較易飽,當地生活指數又相對較香港平,所以若在港賺錢在那裏花錢,就很爽。




(以下價錢以台幣計算,換做港幣大約÷3.8)

在香港排生排死的台式飲料,當地隨便一杯 TW$25,很多選擇:


若果朝早瞓過龍,過了酒店早餐時間,我就喜歡走去紅樓旁吃「金花炭烤吐司」,之前已介紹過 (相關舊文),現在仍然是非常多人!



今回吃了「金花大丈夫」TW$80,很 instagramable:


看似簡單,它的芝士和嫩蛋,還有自家配的花生醬都很厲害:


有時早餐會食碗「花枝羮」,飲杯咖啡就夠,加埋唔使 HK$20 ?!


食完早餐,返酒店。上上網,睇電視,像豬一樣。。。



中午我也吃得很隨便,「火焰牛柳」、「芝士熱狗」、「燒杏鮑菇」都好吃:











另外我很情有獨鍾「阿毛燉飯」此連鎖店,呢間鋪由我大學年代去台北旅行已經存在,店長是一隻真的金毛尋回犬。



可能是莫名其妙的親切感,我幾喜歡食佢啲意大利飯,即叫即製又平:


「青醬蛤蜊 Pesto Clams Rissotto」TW$180 


充滿芝士和羅勒醬,其實飯煮得不太正宗,太腍,將它當做快餐,也就沒有什麼不安啦!食得開心就好了。


如果想食炸雞扒,我會推介這間「娘娘雞扒」,近排好像很火紅似的:


雞扒即叫即炸,要等15分鐘,有手板咁大。調味唔錯,骨也入味,肉厚且嫩:


最緊要是沒有如棉胎一樣厚的炸粉,比較吃得出雞的質感,不會像「豪XX雞扒」般,食完咀都損。。。


另外在「阿宗麵線」橫街對面有一間賣三文治的,非常鬆軟,每次來都會吃,我覺得好食過「洪瑞珍」:


走走趴趴,悠閒地過了大半天,對我來說已很奢侈。晚上通常會約當地朋友吃飯 (會另文分享),若果沒約,也吃得很簡單,不用想就會去我的飯堂「老山東」吃牛肉麵 (相關舊文):




米芝蓮評級,各樣出品由冷盤、牛肉麵到水餃都做得好:




每次見到咁多冷盤,就會心花怒放!




食完咁多野,HK$70埋單,呵呵 XD


好,今集講住咁多先,下集會帶大家食港人瘋愛的平靓正古早味滷肉飯,呢間鋪真係香港遊客多過當地人,很多人生百態,值得一講再講。Stay tuned !
Related Posts Plugin for WordPress, Blogger...