合作企劃

2019年1月19日星期六

《米芝蓮二星》: 營致會館


先感謝友人請我吃生日飯,挑了中環「營致會館」。當天是星期日,五位食 lunch,原來大家都未吃過此餐廳呢。



它在 2017年開幕,請來「都爹利會館」的蕭師傅掌廚,開業三個月便奪米芝蓮一星,今年更升上二星,令我們有些期待。


吃完之後,我們不約而同感覺是「好似乜都差 DD ?!」,頗多項目也不似預期。


我們食飯期間沒多說話,比較多觀察;之後埋單,離開餐廳,在外才討論剛才的體驗。


整體有粗疏大意位,有細節位則可以做得更好。未談食物前,我先歸納一下 (已用比較含蓄的方法去描述):

1. 今回是小弟負責訂位。接線生是有少少大媽 (恕我用這個字,會較易明) feel 的語氣對答,例如:「吓?講多次幾多號電話號碼?」這是我對餐廳的初步印象,日常小事一宗,沒太在意之後週日早上收到電話錄音留言,reconfirm booking,都是這一類語氣。

當天去到餐廳,我是第三個到達,有兩位朋友已在內坐着,門口並不繁忙。女 receptionist 有禮地問我 booking,我說:「Booked 咗 12點,五位,何先生。」(小弟姓何)

該職員 checked 完後答:「有,何小姐五位,到咗。」

我嗰刻呆了一呆,其實是怕她搞錯了其他人的 booking,我再講一次:「係何先生喎!」,佢隔了兩秒,之後答:「啊,唔好意思,何先生。」整體感覺怪怪哋,這只是開始。



2. 我們三個先到達的,坐低開茶,叫了一壺「香片」。我們邊飲茶,邊傾計等另外兩位朋友。茶壺在我右手邊,我是頭向左手邊與友人傾計。

飲飲吓茶,其中一位朋友發現茶的味道唔同咗,點解會變咗「菊普」?!向侍應查詢,原來是將我們壼茶同隔離枱掉轉了。這是普通酒樓都不應犯的低級錯誤???侍應立即話唔好意思,換番壼香片俾我哋 (卻沒有換杯)。

順帶一提,這裏五位茶錢加一碟放在枱面的調味辣醬蒜粒,總共收 $190 茶芥再 +10%。這個與人「撈亂茶壺」的錯誤對我來說,無論米唔米芝蓮,都是不能接受,可能我哋嗰日倒楣啦。



3. 如果一心想來飲茶食點心,我不會建議來這裏,因為點心選擇比較少,只有這兩版:



當天是星期日,點心 menu 第一版揭開就是「商務套餐」,記憶中是人均 $1,xxx +10%。誰會想在週日中午,一家人或一班朋友,吃人人一樣的「商務套餐」?!建議週日可以拿走呢一版,或放在最後,反正餐牌都係可郁動的活頁那種?!至於其餘食物選擇,就在另一大餐牌上,是小菜和各項鮑參翅肚之類。先撇開價錢,中午食呢啲,是有點 over。


4. 點心餐牌沒說明份量,只有價錢,要向侍應查詢才知道。原來「燒賣」一籠是三粒,「叉燒包」一籠則是兩個,款款數量不同。予其要人客逐個問,何不清楚寫在餐牌上?


我的貼士:如果嗰樣點心人人都食,乾脆就叫佢計人頭整每人一件,比較方便。如果是腸粉之類,應該都是 share portion。一些 fancy 的點心、比較貴、或不是人人都食的,最好問清楚一籠的件數。


5. 有些點心可按人頭計,例如燒賣我們點了五粒,佢會分開兩籠上,一籠三粒,另一籠零碎地放兩粒 (估計是蒸好咗一籠三粒,拎走一粒再上桌)。計埋其他點心,結果成枱都係籠,但食物都是重複。建議可以擺盆精緻點,例如將五粒燒賣擺在一起,慳位靚仔專業。


6. 我們先吃點心,後加小菜。中途問侍應 (還是經理?) 有什麼推介,他轉頭拿了大餐牌給我們,說:「全部印晒喺呢版度,樣樣都出名,可以自己睇。」嗰刻我們呆哂。作為米芝蓮二星 (或作為高收費的餐廳),侍應應可建議一些較受歡迎或 signature 的小菜給人客,這很合情理和期望,人客也開心;要自己睇自己挑,就有點兒敷衍,呢個位又係差 DD。


7. 吃炆伊麵前,侍應生替我們換上新的碗,可惜其中友人那隻碗是污糟的,有舊黑色嘢黐住,要叫侍應換過。食物好唔好食是個人感受,但係衛生就係客觀,這方面我個人也是接受不到。


講住咁多,食嘢先。點心「XO醬脆煎腸粉」$88


幾特別,它是半煎炸,似炸馬拉的粉粿條,外皮脆卜卜,香口好食,擺盤也靚,值得一試。

「蜜汁豚肉叉燒包」$72 / 二個,算不算是天價叉燒包?味道評價是和普通的叉燒包沒兩樣,係咪 value for money,見仁見智:


「瑤柱鮮菇滑燒賣」$84 / 三粒


加一後約 $30 一粒,也算不算是天價?個人覺得不錯,肉鬆軟,具肉鮮,裏面的蝦也爽彈大隻。


「蜜汁豚肉叉燒腸粉」$88


腸粉皮薄如蟬翼,確滑溜;叉燒肉因為撈咗臘腸粒 (?!),有點膩。我會建議轉做蝦腸,效果可能會發揮得更淋漓盡致。


小菜「脆香貴妃雞」$300 / 半隻,做得非常好:


它該是將一隻鹹雞浸熟,內裏皮肉中間保留啫喱狀精華,然後略為炸香。皮脆與肉嫩都有做到,肉生熟程度剛好,也不用點任何調味,好食。


反高潮,下一道「薑蔥花膠絲燴麵」$280 / (約五碗) 就很糟糕,個人完全不建議點,也不值賣此價錢:


麵煮得太腍,幾乎去到爛的程度,而且調味極淡,奇怪。廚師一時失手?!


最後甜品部份相對比較好及穩定,「蓮蓉西米焗布甸」$55


 溫暖順喉的「香檸馬蹄露」$55


「奶黃馬拉卷」$54 


「花生豆沙涼卷」$54,造成如意「8」字的形狀,似日本和果子,作為生日的祝福不錯:



總結。我覺得來吃晚飯點大菜,多一些人來吃,或是商務午 / 晚餐,會比較合適;服務和食物皆有進步空間。值唔值米芝蓮二星?不論你如何評價「米芝蓮」這套,我會比喻今次體驗為「菊梓喬攞最受歡迎女歌手」,大家各自理解啦。希望有關方面可以加油做得更好,keep 住那兩顆星星。


「營致會館」
地址:中環干諾道中41號盈置大廈地下G05, 107及108號舖
電話:2801 6882
營業時間:11:30-15:00,18:00-23:00



若你喜歡此部落格,也請你 like 一 like,感激!

沒有留言:

發佈留言

Related Posts Plugin for WordPress, Blogger...