又來生日飯局！今次 #MarkSix 小組齊人，加埋 M小姐伉儷，齊齊替主角 Jacky 哥哥吃晚飯慶生。
從來都說，食飯最緊要係啱飯腳，開開心心，食乜嘢係其次。。。點解咁講？
今次我們到經典粵菜餐廳「西苑」吃晚餐，吃後感一致感覺出品有好有一般 (主要係隻片皮鴨累事)，不過都沒影響我們的興致，是個開心的聚會，有大家真好！
來到又係雞啄唔斷，同埋互相交換禮物手信時間，這已變成我們小組一見面的默契，覺得有啱對方嘅就會買或帶來送給大家 XD
講返「西苑」，相信很多朋友都不陌生，此老牌粵菜館算是早期香港名人和富豪飯堂，最出名當然有鄧肇堅爵士的私房湯方，由「西苑」將之發揚光大的「爵士靚湯」，亦成為香港經典名湯之一。
餐廳裝修是傳統中式酒家格局，門口張燈結綵，有不同字畫及古董擺設，來到已有種老派酒樓風範。
我們預訂了一隻「片皮鴨兩吃」HK$460
肉質比較粗糙，亦不覺特別香，我會歸類為一隻不太合格的片皮鴨，吃到後尾鴨肉有剩都沒太有意慾夾來吃：
「中式煎牛柳」HK$248
味道調味可以的，不過牛柳肉質給鬆肉粉揦得太過厲害，食落去肉質過份軟腍，似去食豉油西餐「鋸牛扒」嗰種質感，是否來對應返應有的「年代感」？
失去牛肉應有質感，個人意見整體對它打了折扣，而且以這價錢也不要浪費好的牛柳 (如是)， 甜酸合格，口感扣分：
反而值得一讚係配角洋蔥，索晒汁的味道，有比牛柳更好吃啊：
有 M 博士喺度一定要有香口嘢啦 XD 「椒鹽鮮魷」HK$188
呢味好食，估不到成為全晚其中一個亮點：
鮮魷炸得乾身不油，外層脆漿薄而脆，咬落去不會成口粉：
魷魚本身新鮮，椒鹽調味恰到好處，鹹香惹味，做得好，廚師應記一功：
另一位 M小姐指定點的「豉油皇銀芽炒鵝腸」HK$168
芽菜絲墊底，中間是豉油王炒鵝腸，上面鋪滿蔥絲及灒了些熱油，也是全晚另一個 MVP，有驚喜：
上枱好香豉油味，相信是熱油激發出來，鵝腸爽脆沒異味，豉油調味鹹甜適中，好吃，也感受到鑊氣：
芽菜又係索晒汁，墊底的我們都清埋，這個值得 encore ：
片皮鴨第二吃可以做「生菜包炒鴨鬆」等，我們選了比較惹味的「涼瓜炆鴨件」
相信這是個錯誤的選擇，切出來鴨架肉太靭太大件，做得不入味，炆的時間不夠，亦太油膩。。。
「食之無味，棄之可惜」，無理由成煲咁浪費掉咗佢，結果我哋有成員打包返屋企將佢二次創作，切細加節瓜、枝竹自己再炆，聽說好吃多了：
無比較無傷害，咁蹺過兩日在第二間餐廳同樣吃了片皮鴨兩吃第二吃用來做「鴨鬆生菜包」，不論一和第二吃都好得多。。。
唔緊要，繼續傾傾講講說說笑笑，這晚高潮來臨，就是替壽星慶祝的「生日壽桃」(事先預訂)
壽星誠心許願，吃過壽桃，開開心心願望成真！
餐廳送的甜品「綠豆紅豆沙」
整體當晚以食物出品來說，可歸類有好亦有平平，穩穩陣陣的可以叫番叉燒或爵士湯，應該不會再來吃片皮鴨了，若會來吃的朋友仔，建議第二吃試一試生菜包。雖然有些菜式未如理想，老牌酒家環境同氣氛依然，甚適合同朋友聚會慶祝，點菜就要揀啱心水喇 😊
再一次 ㊗️ Jacky 哥哥工作順利，身體健康，每天都勁歡樂！同埋我哋小組共同目標早日達成 🎉
「西苑酒家」
地址：太古太古城道18號太古城中心2樓208號舖
電話：28854478
營業時間：星期一至六 11:00-22:30，星期日 10:00-22:30
沒有留言:
發佈留言