龍少爺 : 2018-05-27 褪色的老校友？香港大學校友會

2018年5月26日星期六

上集講到同大學師姐碰面 (相關舊文)，咁順便講吓大學相關的食事啦。

作為畢咗業 1X 年的校友，對「港大」仍是有情意結，校訓「明德格物」亦畢生受用。

想重溫大學的飲食二三事，除了返 campus 的 canteen 外，亦可去中環「香港大學校友會」食一系列撚手小菜。

對上一次來是 2012年，有寫 blog 做紀錄，小菜是做得非常好 (相關舊文)。六年後重來，部份小菜水準係有啲跌 Watt。。。

唔講咁多，食嘢先。先上「菜膽杏汁白肺湯」$420 (約分到 13 小碗)，屬名物之一：

以往的出品是杏汁濃郁，湯幼滑順喉，料頭靚亦足，豬肺是可以夾來吃，真係做到「零死角」，有口皆碑。

今次的是杏汁味大倒退，材料碎濕濕，湯稀巴巴，似一般例湯，失望，也不值賣這個價。

「鳳尾蝦多士」$293 / 13 件，原隻蝦黏在麵飽上，用金華火腿及芫茜作點綴，炸至脆口：

係炸燶咗啲，味淡，咬落去唔會有種「好正啊！」的感覺，水準比惜日遜色。

「脆皮炸雞」$420 / 隻，要預訂的菜，就這樣大。貴嗎？怎說也不能算是便宜吧。

相比之下，我會較喜歡這裡的「鹽焗雞」，是用牛油紙把新鮮雞包住用鹽生焗，附全副雞什，雞肝油潤惹味。此炸子雞就很大路，皮又是炸得 over。充撐場面的蝦片是諗的，煞風景，唔放好過放。。。

「椒鹽鮮魷」$220 就狀態回勇，金黃酥香，肉彈，調味亦剛好，好下酒：

「菠蘿咕嚕肉」$238

呢個仲 keep 到，外層獻汁甜酸度剛好，均勻地掛在每塊枚頭豬肉上，內層鬆軟亦保存了肉汁，下飯菜。可惜以前有的子薑，現在就無聲無息地被 DQ，消失在此菜。

第一次吃「翡翠生魚卷」$278

還不錯，炒功扎實，西芹爽脆，去骨生魚啖啖肉，無泥味。建議可加入炸蒜子或辣椒去提香，現在味道就有點平淡。

「啫啫生菜煲」$160。唔掂，上枱時已出哂水，亦沒有「滋咧啫𠼱」的聲音，靜過鬼。可能選芥蘭會好啲，起碼唔會出水沖淡蝦醬味道：

「鮮荷葉飯」$220，太乾喇，也沒有什麼餸料及味道：

今回吃得若有所失，半飽不餓。。。加埋汽水、茶芥同「竭靂卡啦」收費，埋單約 $2,900。感覺上，這位老校友，有些褪色了。

「香港大學校友會」(只招待會員)

地址 : 中環德己立街2號業豐大廈101室

電話 : 2522 7968

營業時間：12:00-23:00

若你喜歡此部落格，也請你 like 一 like，感激！