合作企劃

2018年8月22日星期三

北京片皮鴨 $98 一隻,伏唔伏?


有些酒樓的名字,你唔會覺得佢似酒,例如呢間叫「嘉豪」,似人名多過食肆。它的姊妹店是否叫「嘉敏」?XD



原來「嘉豪酒家」在港九有五間分店,都有些規模,我自己是第一次來,毫無頭緒。

來上環分店,是見網上有 $98 一隻北京片皮鴨,只限此店。作為「北京片皮鴨會」成員之一,乾脆來試試手勢如何。

晚飯時間,無乜人客,商業區,明白的,該是靠隻片皮鴨吸引人流吧。我的第一個意見,是這裡的碗、碟、杯都比較烏糟,有上手食剩的餸癡住,幾嘔心,記得洗一洗先用。

入正題,食嘢。上菜速度激快!第一味「清蒸大青斑」$68,在做特價推廣,附帶條件是要 at least 另叫六個正價小菜:


條斑約一斤重,幾新鮮,肉也滑,配甜蒸魚豉油,$68 扺食。(此文以下食物除「北京片皮鴨」外,全是正價小菜)

其實當日一坐低,有位阿姐已不停在推銷「迷你海皇冬瓜盅」$108,枱枱客都話得番最後一個,好似要跑數,煩到你要為止。。。其實佢可以考慮轉行 sell 美容 package 啊甚麼的,應該會蠻成功 XD



真心唔難食,湯幾清同消暑,係料頭比較少。咁湯水始終係清,好過落味精嘅。


「北京片皮鴨」$98 / 隻,好快就被推出來 (要在網上先買 coupon,打電話早一天預留,當日再 redeem coupon)


鴨是一早烤熟那種,完全看得出。其實叫得做「片皮」鴨,精髓是鴨皮要「片」出來。這次是由推銷冬瓜盅的同一位阿姐操刀,切得很粗枝大葉,是一舊舊鴨肉:


予期係咁,我寧願佢好似斬燒鴨咁斬開一件件好過喇。。。(隨鴨附送餅皮十二塊、蔥絲和海鮮醬)


第二食,另加 $78。挑了用來炆涼瓜,整體比較油和鹹:


歸納以上,始終一分錢 一分貨,亞視永恆的真理。。。若果想吃真 • 北京片皮鴨,個人建議不要來這裡,食其他小菜啦。

有兩道小菜我覺得是好吃的,「沙嗲金菇肥牛煲」$88,其貌不揚,味道出奇地不錯,有椰奶香,粉絲索晒汁:


另一味「銀魚仔鹹魚蓉韭菜花魚崧」$88。全晩這個最得我歡心,似「小炒皇」,梅香鹹魚吊起成個餸的惹味:


以下是我覺得不濟,或可以進步的。「椒鹽焗肉排」$88,隔住個 Mon 都 feel 到乾柴柴。。。


「椒鹽鮮魷」$88,鹹度可以收細番少少:


「金銀蛋莧菜」$78,似廁所壞水喉的浴盤般水汪汪,是汪洋中的一堆草。。。


「蝦醬啫啫生菜煲」$88


「滑蛋炒蝦仁」$98,我食落覺得 okay 滑,同枱食友就食到有蛋殼。。。


呢味叫「蜜味子薑炆雞」$88,雞件細小得可憐,骨多過肉。其實若果雞的部位不靚,我寧願佢斬大嚿啲,起碼有骨可以吮吓:


用鑊仔上的「中式牛柳」$88。牛柳是被鬆肉粉嗱到 over 那種,滑撩撩,調味是好的,若不介意肉質的話也好下飯:


「楊州炒飯」$98,與一街之隔的「楝記」出品差不多 (相關舊文),價錢貴兩、三倍。貴些少,不介意,卻可以把飯炒啲、乾身啲,同多番少少餸吧?!


整體來說,呢位「嘉豪」兄出品一般,來食蒸魚、炒魚崧、金菇肥牛 okay 的,片皮鴨就唔使喇。同埋溫提,埋單時記得 check 清楚張單,大家應該明我意思啦。

下集再傾!



「嘉豪酒家」
地址︰上環皇后大道中328號中源廣場UG層
電話︰2815 8133
營業時間︰06:30-23:30




若你喜歡此部落格,也請你 like 一 like,感激!
Related Posts Plugin for WordPress, Blogger...
合作企劃