合作企劃

2018年8月19日星期日

泉記車仔麵:生活點滴一宗


寫 blog 的好處,是可以為自己生活留下些點滴;翻查紀錄,我好似無乜寫車仔麵。以前逢月尾的一篇文叫「有發生過」,歸納該月雜碎食事,好像有提過,正式寫就應該只有之前做《開心日報》的一集 (相關舊文)。




今次呢間「泉記」,可以叫做隱世,因為它藏於新蒲崗工廠大厦的小巷,正常是不會專誠來食飯,人客該是附近返工的人吧。


上週末到 studio 試廣告造型,之後落大雨,我無帶雨傘,反正又未食晏 (已是 around 4:30pm),就隨便入「泉記」食啲嘢,等停雨。


內裡是四個打對面單位,一般茶餐廳格局,賣的價錢都很大眾化。因為是落場時間,人客甚零星。


侍應們和煮麵的大媽,看似是一家人,招呼對答都相當友善。首先有位後生哥仔招呼我坐,沒有推銷甚麼食物,卻相當健談。

他說:「出面落大雨,慢慢食,慢慢坐啦。」

「怕你悶,睇電視新聞台啦!」


室內冷氣其實幾夠,因為無人,蠻好坐。我先叫碗「兩餸車仔麵」$24,加一餸另加 $4。

選了蘿蔔、豬大腸、豬紅、配油麵。可惜豬紅、油麵賣哂,就改做魷魚和伊麵:


蘿蔔清甜無渣:


大腸輕透滷水香,細細件無異味:


魷魚就相對較弱,是啤水那種,不入味,要靠咖哩汁打救:


食完,仲未停雨,睇咗陣電視。之後我行去對面一位大媽阿姨 (是同一店舖),叫碗「牛腩河」。


阿姨:「唔好意思啊靚仔,兩樣今日都賣哂,聽日先有。」

我:「咁要碗牛肚米,多色。」

阿姨笑答:「好,都正㗎!」

「五香牛肚米」$24 上場:


未算是很靚的金錢肚部位,炆得入味倒也真,也不失咬口:


米粉爽口,湯底也不令人口喝,吃得過癮:


食完再坐多陣,雨勢稍減,我真係夠鐘要走喇。埋單,我問那位和藹大媽,有冇雨傘可以賣俾我。

她:「哎呀無呀。咁啦,我幫你搵塊紙皮箱蓋,你用嚟頂住,行去鑽石山地鐵站啦!」

她就在一大堆紙皮中,幫我找了一個最乾淨又擋到雨的給我,那刻我是有些感動。。。謝謝。

即使食物味道有任何不足,人情味,已搭救。



「泉記茶餐廳」
地址:新蒲崗五芳街26號地下2A-2E, 1C-1D
電話:2320 0120
營業時間:06:00-18:00




若你喜歡此部落格,也請你 like 一 like,感激!
Related Posts Plugin for WordPress, Blogger...
合作企劃