龍少爺 : 2015-05-26 麻甩三國誌

2015年5月25日星期一

很久沒有來北角「東寶小館」，對上一次都有三幾年前，吃風沙雞，吃小炒，還有用「戰鬥碗」喝啤酒，一班圍埋麻甩局，始終那股兄弟風味，似「三國誌」般互相碰碗，是別處找不到的。

今次再來，我們一班兄弟 (其實仲有兩位美少女) 叫餸很隨意，唔夠飽想吃什麼，就叫什麼，上菜的次序也有點混亂，一副杯盤狼藉的模樣，爽！有些菜式是由侍應發板，所以正確菜名也不太肯定，看圖識字啦。

「豬大腸拼菠蘿」

到大排檔唔食炸大腸，就如接吻對方有口臭一樣，會心諗：「唔係啊化」。。。大腸無異味，外皮炸到脆卜卜，裏面也沒有令人討厭的超肥膏，剛剛好，再襯埋一大舊新鮮菠蘿一齊吃，掂。

「墨魚丸墨汁意粉」

唔使用「美源髮彩」都由頭黑到落尾，新鮮墨魚加入墨魚汁打成肉丸，再用墨魚汁同意粉一齊炒，出奇地味道唔錯，鮮味，墨魚的來貨應該幾靚。食完記得E起棚牙笑再 selfie，可以鬥吓邊個排牙黑啲。。。

「薯仔牛柳粒」

我不褸麻麻哋炒薯仔，怕吃完會胃痛，就是這樣。

「風沙雞」

印象中這個沒有以前那樣好吃，以前的雞皮比較脆，雞的肉汁也比較多，退步了。是來貨的問題嗎？

「金菇肥牛粉絲煲」

滾熱辣程度直頭超過100度，見到都㷫烚烚。侍應在席前將沙嗲汁與金菇肥牛撈埋一堆，仲要個砂煲是崩的，夠風味。大家都無用公筷，咁高溫真係乜嘢菌都殺曬。。。(認真 mode : 其實記得要用公筷)

「黃金蝦」

有些食物味道不錯，但你總是不會愛上它，對我來說乜乜黃金蝦之類就是一個例子。其實炸得不錯，鹹蛋黃調味也沒有鹹到生腎石，恰到好處，但不喜歡吃就是不喜歡，無得解。

「紫菜豆腐」

侍應大哥替我們揸主意的，菜名應該不是這個，但材料肯定是這些 XDDD，味道像不臭的炸臭豆腐，沒有什麼特別，這形容貼切嗎？！除非你很想吃豆腐，否則我覺得這個可以 skip。

「蓮藕炒黃喉」

非常夠鑊氣，材料都是爽脆之物，豬的喉嚨像軟骨般脆，中間很索汁。

「涼拌青瓜」

後追的冷盤，實在落得太多芫茜，小弟吃不下，非戰之罪。

「炸什瓜」

朋友指定叫的，非常好吃！材料是一堆不知名的瓜類東東，炸得不油不膩，粉漿沒有成呎厚，可算是炸物之中比較健康的選擇。

「凍瀬尿蝦」

吃這個之前一定要飲幾啖啤酒，清一清味蕾去品嚐蝦肉的甜美。瀬尿蝦有筷子那樣長，肉厚，而且已經切開一件件，很容易就吃到裏面的肉。

「花甲蒸水蛋」

妹仔大過主人婆，蒸水蛋滑溜，吸晒花甲的鮮味，花甲慘被淪為茄喱啡。

「啫啫唐山菜」

大排檔名物，可以說是沒有失手的理由。

「椒鹽墨魚咀」

同墨魚咀來個 goodbye kiss，飲飽食醉喇。大家開啟「自動導航」，歸家去。。。

「東寶小館」

地址：北角渣華道99號渣華道市政大廈2樓

電話：2880 5224