龍少爺 : 金話莓系列 (十) 海南雞飯專門店 ?

2019年4月8日星期一

金話莓系列 (十) 海南雞飯專門店 ?

又要說下故。話說有日我要出「旺角電腦中心」，買拍攝錄影器材，順道食個快飯。

本來諗住去「肥姐」買滷味三寶食，可惜未開門：

咁退而求其次啦，沿住條路行，見到有間「味皇」，自稱「海南雞飯專門店」。門口貼上海南雞飯的照片，原文節錄 :「自設農場，無公害，無激素，天然粟米飼養，雞味特濃」

哇！好誇好利害啊，一於入去試吓咩料子。

店入面還貼出兩大招牌菜的相，幾靚仔：

裝修雖然是茶餐廳格局，仍見到有心思，有不少老香港的圖案：

立即落單。套餐 $55 送湯或即磨咖啡，我挑了前者，「椰子雞湯」

看樣子幾足料，有新鮮椰子肉、雪耳，可惜是味精水一碗。唔明白，煲湯材料唔差，點解梗係要落咁多味精，其實可以自信啲，寧願淡味啲人客落鹽調味，都好過佢落咁多「師傅」。我嗰一刻想法當然是十萬個後悔，早知要杯咖啡。

「無骨海南雞飯」上檯：

首先雞皮多個肉，皮下那層雞油相當多。係咪「無公害，無激素」我唔清楚，「雞味特濃」就一定唔係。我哋唔好笑前亞視一姐黃麗梅話「雞有雞味」呀，依家食雞唔單止可以無雞味，直頭係無味。不知名的青綠色汁醬：

有人說要看一道海南雞飯正不正宗，見微知著，只要看它的醬汁就可以，尤其要有馬來西亞或新加坡式的甜黑醬油。但現實中，醬汁從來是最令人最懊惱的一環，由甜豉油、辣汁、白切雞蔥油、泰式甜炸雞醬、麵豉醬乜都有。今次除咗樓上不知名青綠色汁醬，仲有中間的黑醬，同埋蔥油。

正常以為中間是甜黑醬油、或者是海鮮醬之類啦，當然不會奢望是海南雞黑醬油。

我將雞肉去點醬，放入口，點知竟然係
.
.
.
.
.
.
.
.
.
蠔油，食落鹹到飛街！！！嗰刻忍唔住爆咗一個 X 字粗口。。。

我心諗點呀？就咁倒蠔油都好有誠意啫，就算真係有雞味都俾啲蠔油味遮晒啦？！不如落埋余均益同腐乳做三寶，貫徹港式風味啦。。。同埋我相當肯定，嗰碟蠔油一定唔係用嚟點墊住雞下面嗰塊爛生菜葉，咁係用嚟點咩呢？？

至於好吃的雞油飯，要香軟油潤，帶香茅南薑味，這個當然沒有，竟是菠蘿炒飯那種，有色無味，配搭奇怪：