合作企劃

2019年4月8日星期一

金話莓系列 (十) 海南雞飯專門店 ?


又要說下故。話說有日我要出「旺角電腦中心」,買拍攝錄影器材,順道食個快飯。




本來諗住去「肥姐」買滷味三寶食,可惜未開門:



咁退而求其次,沿住條路行,見到有間「味皇」,自稱「海南雞飯專門店」。門口貼上海南雞飯的照片,原文節錄 :「自設農場,無公害,無激素,天然粟米飼養,雞味特濃



哇!好誇好利害啊,一於入去試吓咩料子。

店入面還貼出兩大招牌菜的相,幾靚仔:





裝修雖然是茶餐廳格局,仍見到有心思,有不少老香港的圖案:




立即落單。套餐 $55 送湯或即磨咖啡,我挑了前者,「椰子雞湯」



看樣子幾足料,有新鮮椰子肉、雪耳,可惜是味精水一碗。唔明白,煲湯材料唔差,點解梗係要落咁多味精,其實可以自信啲,寧願淡味啲人客落鹽調味,都好過佢落咁多「師傅」。我嗰一刻想法當然是十萬個後悔,早知要杯咖啡。

「無骨海南雞飯」上檯:


首先雞皮多個肉,皮下那層雞油相當多。係咪「無公害,無激素」我唔清楚,「雞味特濃」就一定唔係。我哋唔好笑前亞視一姐黃麗梅話「雞有雞味」呀,依家食雞唔單止可以無雞味,直頭係無味。不知名的青綠色汁醬:



有人說要看一道海南雞飯正不正宗,見微知著,只要看它的醬汁就可以,尤其要有馬來西亞或新加坡式的甜黑醬油。但現實中,醬汁從來是最令人最懊惱的一環,由甜豉油、辣汁、白切雞蔥油、泰式甜炸雞醬、麵豉醬乜都有。今次除咗樓上不知名青綠色汁醬,仲有中間的黑醬,同埋蔥油。

正常以為中間是甜黑醬油、或者是海鮮醬之類啦,當然不會奢望是海南雞黑醬油。



我將雞肉去點醬,放入口,點知竟然係
.
.
.
.
.
.
.
.
.
蠔油,食落鹹到飛街!!!嗰刻忍唔住爆咗一個 X 字粗口。。。

我心諗點呀?就咁倒蠔油都好有誠意啫,就算真係有雞味都俾啲蠔油味遮晒啦?!不如落埋余均益同腐乳做三寶,貫徹港式風味啦。。。同埋我相當肯定,嗰碟蠔油一定唔係用嚟點墊住雞下面嗰塊爛生菜葉,咁係用嚟點咩呢??

至於好吃的雞油飯,要香軟油潤,帶香茅南彊味,這個當然沒有,竟是菠蘿炒飯那種,有色無味,配搭奇怪:



佢隻雞咁肥,將啲比較靚的雞油放在飯裏面煮,應該不錯。既然你叫得做「專門店」,就不妨做返好少少,用雞油煲個飯其實好簡單。

連最耍家嘅食物都係咁,咁叫人點敢叫其他呢?埋單走人。門口寫着「多謝!下次再見」,應該唔會有下次啦,恕小弟唔識食。





唔夠飽,去了「大家樂」食「吉列豬扒烏冬」$28




起碼圖片與真實相符,有比較之下,味道都唔係差到極啫。呢個世界,真係「一山還有一山低」,莫見笑。




伸延閱讀:

金話莓系列 (九) 波士頓

金話莓系列 (八)「無敵家」

金話莓系列 (七) 一堆圖文不附 / 千奇百怪劣食 (不喜勿入)

金話莓系列 (六) 食好西?


金話莓系列 (五) All Day Breakfast - Café Two

金話莓系列 (四) 近來吃過一堆頹飯 (下)

金話莓系列 (三) 近來中午吃過的一堆頹飯 (中) 

金話莓系列 (二) 近來吃過的一堆頹飯 (上) 

金話莓系列 (一) 意大利菜Cenacolo




「味皇餐廳小廚」 
地址:旺角花園街1號鴻禧大廈地下6號舖
電話:3568 3282




若你喜歡此部落格,也請你 like 一 like,感激!

沒有留言:

發佈留言

Related Posts Plugin for WordPress, Blogger...