米芝蓮鑊氣小炒 - 增煇大排檔

如要講去大牌檔 (大排檔) 食飯，我的心水有深水埗「愛文生」，貴咗好多的北角「東寶小館」(相關舊文)，上灣街市「棟記」(相關舊文)。有時來瘋狂吃一下小炒炸物，總是有它的魅力。

「增煇大排檔」，只做晚市及宵夜，算係這類飯店中的星級人馬，今年冧莊得到米芝蓮推介：

我覺得呢間鋪頭，有幾項小菜會給你有 wow 的感覺，其他小菜質素也中上，一定唔難食，收費就比一般小炒店貴，已算係酒樓價。這個明白理解，米芝蓮光環效應。

先來「泰式生蝦」$88 / 碟，擺盤很 instagramable，蝦肉爽口新鮮，汁也醒胃。坐我隔離條友，一個人食咗六隻。。。

「脆皮燒腩仔」$118

來吃椒鹽系炸物走唔甩啦，熱辣辣「椒鹽九肚魚」$98，這個我是有 wow 的感覺！

椒鹽九肚魚易做難精。一來要控制火候，做到外脆不油不過燶；二來調味要惹味不過鹹；三要保持肉嫩卻又要先處理令人討厭的魚骨，甚考功力。這裏幾方面都做到了，可以成舊安心吃，送飯或送酒皆宜，encore 了兩碟：

味自慢「鬼馬脆油條」$88，將墨魚膠釀進油炸鬼裏面再炸，之後點甜酸汁吃，在網上有甚多好評：

我食咗兩件。第一件好食的，有做到外脆且墨魚膠彈彈弓；但第二件可能剛巧是油炸鬼硬的部位，就比較難搞，咬崩牙跤。整體沒有去到我想像中被讚到「天上有地下無」的誇張程度，也不會「好食到流眼淚」，一試無妨。

「黑椒蒜片牛柳粒」$108

肉質俾鬆肉粉弄過，卻成為在座不少食友的心頭好，票選為最 wow 的一碟。真心講係調味救左佢，「美極」香口不過火，黑椒蒜片的鑊氣也加了分。

從來我都是怕魚腥的人，也不吃魚腸。在座有人喜歡，就來一個「砵仔焗魚腸」$83

即焗即起，邊位仲滋哩啫𠼱。淺嚐一啖，在胡椒粉幫助下味道沒太腥，卻始終不是我杯茶，個人問題。

「砞酒焗生蠔」$168，這個調味可以做得更好：

美國蠔大大隻，走油後再焗，可能酒太重手，有些少苦苦地。我覺得可以落多少少糖吊返起個味，同埋蠔油、豉油重手番啲：

「蝦醬珊瑚骨」$118

「胡椒蘿蔔蝴蝶腩」$138

原個鑊仔上，邊滾邊吃，我相當肯定它不是蝴蝶腩部位，碎濕濕乾柴柴。可取的是那個像胡椒豬肚湯的湯底，和入味白蘿蔔：

「招牌頭抽雞」$388 / 隻

總結同檯食友評語，此雞也甚多讚賞。皮與肉均嫩，味道略似瑞士汁輕盈版：

用上新鮮雞，連成副雞什上，誠意位：

「魚香茄子煲」$78，點俾吃白飯的人：

「士多啤梨骨」$118

「西蘭花炒帶子」$118

「蒜蓉炒豆苗」$108

呢個有 wow 驚喜喎。我起初以為只是平淡的炒菜，原來用上金、銀蒜夾攻，鑊氣正，超香！

「燒鵝汁薑蔥炒麵」$83，沒太吃得出燒鵝汁味，但作為一道炒麵，它是有做好本分的，油潤香口，可配「余均益」同吃：

「蛋白菜粒炒飯」$78

整體而言，各樣小菜味道均不差，鑊氣足，價錢稍貴，也適合一班朋友麻甩飯聚。清潔程度算不錯，有幾項拿手小菜，值得來重溫！

「增煇大排檔 / 增煇廚藝」
地址：深水埗石硤尾街30至33號地舖
電話：2778 8103
營業時間：17:30-02:00

若你喜歡此部落格，也請你 like 一 like，感激！

https://www.facebook.com/siuyeahdragon