2012年2月17日星期五

2012-02-17 [太陽報報道 2012-02-16] 龍少爺 親試話題燒肉店

(原文轉載)

龍少爺 親試話題燒肉店


近年香港團購風氣盛行,除了家電、精品,不少食肆都湊熱鬧推出團購優惠。有大酒店及高級餐廳平賣益食家,亦有一些新開的食肆蝕做當宣傳,希望以團購吸引客人來試食。策略成功當然好,萬一做得不好分分鐘做壞個「朵」。Blogger為食龍少爺今次所選的Fusion新派燒肉專門店,網上雖然有人讚,但試做團購後卻惹來不少劣評,究竟現實情況又係點。

Round 1 : Taste (5分為滿分)

做生意最緊要口碑,尤其新開業的,好多食客都會上網睇過才會試。位於尖沙咀H8的樓上舖Fusion新派燒肉專門店,網上食評好壞參半,因為價錢唔平,搞到為食龍少爺心癢癢,一直唔知試唔試好。所以今次獲邀,他二話不說選了這間開業約半年的食店,試試到底是龍還是鳳。

烤肉材料質素高

店名叫Fusion,相信跟餐牌內食物沒明確定位有關,既有燒物,又有意大利飯及石頭飯等熟食。而主打的烤肉選擇算多,單是牛已經有牛胸腹、牛肋骨、一口牛、牛脷等,有些還分了薄切和厚切,另外還有雞翼、海鮮和鴨舌。自有一套烤肉心得的為食龍少爺說:「牛胸腹要薄切,兩邊快燒,入口多汁又唔會韌;牛脷要厚切,咬落咇出滿口汁同油,就是其值錢之處。」他讚牛肉質素上乘兼夠新鮮,入口牛味香濃,所以一碟一口牛只有9粒,索價76大元,亦覺得合理。




而對於團購的劣評,他直接問了店內職員的回應,一位有禮的小姐一臉無奈地說:「我哋都好唔開心呀,68蚊有5粒一口牛同5片牛胸腹,仲有黑松露野菌湯、餐飲和甜品,根本係蝕做,其實我哋係想吸引佢哋來試食。」對於做壞了名聲,為食龍少爺私下向小記表示只能寄予同情。

食到藐嘴的意大利飯

除了烤肉外,餐廳還有不少熟食供應,龍少爺見有網友大讚好食,跟風要了一碟海鮮意大利飯,可惜食到藐晒嘴,他說:「面頭的海鮮味道一般,叫做夠新鮮搭夠,不過隻青口就乾到有蠔豉Feel,唔得!以半生為正宗的意大利飯仲腍過糯米飯,味道亦麻麻。」另外,他又要了一客餐牌上沒有的和牛沙律,為餐廳挽回不少分數,牛肉和蔬菜都非常新鮮好味,算是驚喜之作。而全晚最得為食龍少爺歡心的就是黑松露野菌湯。「味道夠濃,湯的口感特別,最鍾意配上新鮮野菌,可以一邊飲一邊食。」





Round 2 : Ambience
店內的裝修設計不俗,以黑色為主調,水晶吊燈、皮座椅,帶幾分高貴感覺,幾個卡座以包廂設計,環境舒適,難怪龍少爺劈頭第一句:「呢度似Cafe多過燒烤店。」可能客人不多的關係,只有三幾枱客,店內未有充斥一股烤肉的味道,就算經過一輪親身「搏火」,離開時身上亦沒有烤肉味,抵讚!





Round 3 : Service
服務方面,侍應態度有禮,會主動倒水和收碟,不過好多時都唔見人,要開聲叫才有人出現。而當客人對食物有意見時,廚師Alex會主動出來向客人解釋,又會主動詢問意見,可見其有Heart想改善。



總評:一試無妨
總括而言,既然叫作燒烤專門店,到來還是吃烤肉最穩陣,所供應的肉類亦吃得出是高級貨,至於貴唔貴則見仁見智。另外,餐廳氣氛環境都很好,食得非常 舒服。對於團購劣評事件,為食龍少爺謂買的無錯,餐廳方面亦無罪,只是雙方在事件上的期望有分歧,而產生誤會而已。

試食檔案

Fusion新派燒肉專門店

尖沙咀厚福街8號H8 11樓

2012年2月6日

2312 1997

網上食評達人info

綽號:為食龍少爺

簡介:香港土生土長,以非典型的Y世代自居。於銀行界從事產品設計,閒時最愛周圍食,不時在網上分享飲食之味,年前開Blog寫食評,經常在開飯網的人氣食家排行榜名列前茅。雖不再童顏,但自稱「巨語」,皆因愛以誇張的形容詞來狠評食物。

嗜好:食嘢、寫Blog、旅行、做運動

網誌:siuyeahdragon.blogspot.com


若你喜歡此文,也請你到 facebook 專頁 like 一 like,感激! https://www.facebook.com/pages/為-食-龍-少-爺/198211286900730?

沒有留言:

發佈留言

Related Posts Plugin for WordPress, Blogger...