2012-02-16 龍少爺話你知 (三) - 菠蘿包

咳咳。。。以下是一些關於「菠蘿包」的冷知識：

1. 現在颱風的名字，是在 2005 年由眾多亞洲國家提名自家有代表性的名字，再投票選出。香港勝出的代表有「啟德」、「鳳凰」、「珊珊」、「白海豚」 、「獅子山」等等。原來最初「菠蘿包」也是候選者之一，可惜最後落選了。咁又係，如果天氣女郎黃婉曼報道話﹕「好喇，我哋而家一齊跳出香港，睇下東南亞天氣。颱風『菠蘿包』現正吹襲菲律賓，『包』的風眼正在馬尼拉上空。。。」本少爺怕她自己都忍唔住笑。

2. 有乜卡通 / 電影人物是用「菠蘿包」做主題的呢？「麵包超人」嘅 friend？「國產零零七」嘅特務？錯錯錯。答案是 -「麥兜」的父親「麥炳」，他綽號「菠蘿油王子」，英文名「Mr. Mcdull，Prince de la Bun」 。

3. 菠蘿包原本的英文譯名是甚麼？不是「Ball Law Bau」，不是「Pineapple Bread」，而是「Rocky Bun」。不過似乎叫番「Pineapple Bun」貼切啲喎！

4. 吃菠蘿包時如何不會吃到滿身「菠蘿」碎呢？只要在吃之前，先用叉壓扁「菠蘿」的面數下，稍為弄成扁的碎塊，吃時自然容易得多。

上星期路過紅磡，見到一間懷舊的「文華冰室」，殘舊到的地步是連招牌已變了做「水室」。時值三點三，食個包最啱！

「熱奶茶」$11

一上桌已聞到一股濃烈的茶味，配上「黑白淡奶」厚杯。對，這就是老式茶記的風味！厚杯能保住茶溫，「黑白淡奶」也是奶茶香滑的必要條件之一。朕是次刻意點了少奶，喝下去，質地比想象中稀，卻反而突出了紅茶香，很不錯。

「菠蘿油」$5

菠蘿包不是熱的，有點可惜；夾在中間的厚牛油仍保持在最冰凍的狀態，份量也給得很大方。相信菠蘿包若是剛出爐，加強與牛油冷熱口感的對比，效果一定好得多。但畢竟只是賣 $5，無投訴啦。

「文華冰廳」各式麵包外賣只是 $3 / 個。臨埋單時見到有位清潔阿姐打扮的女士，walk in 要外賣 30 個雞尾 / 菠蘿包，每個包要分袋載。老板娘一路夾包，一路罵：「你知唔知剩買包又唔叫嘢飲，我哋真係蝕俾你㗎！而家生意難做，蛋又貴，麵粉又貴，人工又貴；賣哂俾你，我哋點做下午茶呀，唉。。。」罵足兩分鐘。結果買包阿姐放低 $90，就拿著一大袋麵包，如獲至寶地離去，老板娘則繼續「嘰嘰咕咕」地埋怨。從這小小的片段，已體會到不論是老板娘還是買包阿姐，她們生活各有艱苦。曾財爺，請你多點落落區，吃吃菠蘿包，聽聽我們小巿民的聲音，政府才會體察到民情。最多菠蘿包，我請！

「文華冰廳」

地址 : 紅磡寶其利街 2 號 B-C 舖

電話 : 2363 934

若你喜歡此文，也請你到 facebook 專頁 like 一 like，感激！ https://www.facebook.com/pages/為-食-龍-少-爺/198211286900730?