唔經唔覺情人節又就快到，今年氣氛好似比農曆新年掩蓋了。通常到了呢啲重要節日，小弟就會變成人肉「黃頁」或「OR」，常被問有甚麼餐廳推介之類。
「情人節」晚餐我覺得要睇 budget 和伴侶的要求。高級扒房、酒店、自助餐有很多選擇，最緊要量力而為同埋兩口子食得開心。老土啲講句，恩愛的話每天都是情人節，如不介意可以正日早兩天或遲兩天才慶祝，食嘢會冇咁貴，正日就食平淡啲或者喺屋企煮飯仔，既 sweet 又可省錢。
今次尖沙嘴的意大利餐廳「Tivoli」，名字源自哥本哈根著名的「Tivoli Gardens」，開放於1843年，一睇個年份就知老牌，它是世上現存第二古老的主題公園。
餐廳在香港也有四十年歴史，老牌西餐廰，相信情人節正日去撐枱腳也不會太肉赤。
裏面裝修有點似古堡，老侍應都着白恤衫打煲呔，彬彬有禮。
(以下價錢 +10% 已是全包價，餐酒除外)
「燒牛柳」$138，點了7成熟。典型豉油西餐，美國牛柳有用過鬆肉粉，兩大塊，配紫棷菜、牛油薯蓉：
有時食扒唔使吓吓 Dry Aged，唔係荷包都會 Dry 埋。。。成碟豐富靚仔，牛扒帶黑椒味，整體調味不差：
女士們可以挑「芝士焗海鮮卷」$208
Lasagne 皮包著蝦仁、魷魚、忌廉，上加車打芝士焗香，再配大量蔬菜：
兩大卷都幾大份， 外香口內爆汁，食落不膩，表面芝士帶 crispy，整體沒違和感。蔬菜就可以加附上的意大利㰖油和黑醋，當沙律吃：
最後包兩杯餐飲。如果是慶祝情人節，可以散點一份甜品，兩人分享，我覺得就剛剛好。
另見這裡有二人餐，$438 有煙鴨胸沙律、龍蝦湯、海鮮焗通粉、芥末牛扒、兩杯飲品，二人撐檯腳是合理價錢範圍。不論地理位置或整個用餐體驗都不失禮，大家不妨可作為情人節慶祝「食平DD」的參考 XD
「Tivoli Italian Restaurant」
地址：尖沙咀柯士甸道130號
電話：2366 6424