好耐冇寫過拉麵，寫下大家熟悉的「一風堂」啦，此乃家庭聚會，慶祝母親節之午餐。剛巧表妹由美國回來，表妹的媽又嚷著想吃拉麵，母親節正日又難 book 位 (其實好的拉麵店有哪一間是可以 book 位 ?!)，四個人就決定去中環分店食一風堂。它也只接受 walk in，早點去就 okay 那種，中環店都叫坐得舒服。
來自日本的一風堂，在當地是蠻有名的大眾連鎖拉麵店，在美國、台灣、中國等地都有店。在香港開業時，也引起過哄動，幾年後的今天，日本名牌拉麵店開得如雨後春筍，大排長龍比比皆是 (查實我是一個超級怕排長龍的人啊)。
咳咳，又講遠左。。。母親大人想食炸蠔，「和風炸廣島蠔」$65 叫了兩碟，蠔炸得乾身，內裡 juicy ，做得幾唔錯。
「南蠻雞」$45，好似係表妹點的，party 類食物。我中午沒有碰它，或許在 Happy Hour 作下酒佐物會更合意。
「迷你餃子」$40，呢個仍然 keep 到，餃子外皮厚度適中，煎得脆㡳，放在上面的葱和薑蓉加酸汁，都讓餃子味道提味。
「辣豚肉炒野菜」$38，和家人吃飯，不論是任何菜式，都要嗌碟菜。
「特製赤丸新味」$88 。赤丸不是指《火影忍者》那隻忍者狗啦，而是辛拉麵，一白一赤亦是一風堂的味自慢。赤丸湯底都是豚骨，加了味噌醬和蒜油，有些微辣，較膩，我比較重口味，再加了兩粒生蒜頭蓉落去提香。
「奉天黑醬油拉麵」$78，一風堂引入的期間限定，由於是福岡奉天本家的，所以與一風堂向來的出品有些不同，湯底是秘方熬成的黑醬油，惹味度不及赤丸，卻就更香。
額外加了$10，要了辣豚肉韮菜，份量不多，也沒啥特別，個人認為不加亦無不可。
「鰻魚石頭鍋飯」$68，又係表妹至愛，話美國唔係成日食到 good 的鰻魚飯，咁我留俾佢食啦。
以大眾連鎖餐廳來說，一風堂的水準算不錯，亦花心思，推出期間限定和噱頭，如早前與幪面超人合作，也相當有趣，相信能繼續為花心的香港人帶來新鮮感。
「一風堂」
地址：中環德己笠街1-13號世紀廣場3樓
電話︰2537 1829