寫博文的好處，就是可以記錄自己的生活點滴。記得第一次光顧 LKF Tower 的「Casa Lisboa」，翻查博文，時為2011年9月，我的開場白是：「此餐廳裝修充滿葡萄牙風情，藍白瓷磚，古典木器，若有人彈結他唱埋歌就 perfect 了。」
約四年後的今日重臨，餐廳真的安排了人彈結他唱歌呢！氣氛確是感覺完美得多。
葡國餐廳在中環不是經常找到，此餐廳已屹立了六個年頭，一向甚得我歡心，今次新大廚 Chef Edgar 上場，有什麼新攪作？
店內藍白瓷磚依舊，今晚是十多隻嘩鬼飯聚，乾脆在VIP房吃飯，不怕嘈親隔離。
吃鹹魚馬介休已是吃葡國菜的指定動作，「炸馬介休球」$100 是大路選擇，穩穩陣陣。
相比之下，我更喜愛新菜式「傳統焗忌廉馬介休」$90，馬介休絲加入忌廉、洋蔥、薯茸焗香。
用來塗多士吃，再配上一小粒橄欖，鹹香creamy，一件成啖放入口，原來我個口都幾大，怪唔得 P 兄成日叫我做「東涌香取慎吾」。。。(我可唔可以揀返做「大角咀黃宗澤」? ? )
另一款新菜「葡式香酥 BB 沙甸魚多士」$120，是較少見到，有驚喜。
魚如其名，香與酥也有做到，鬆化，沙甸魚全條連骨吃，趁熱吃是完全不腥。
葡萄牙地勢靠近海洋，有山靠山，有水靠水，大自然定律也，也造就了葡國菜多用海鮮入饌的文化。「欖油慢煮大西洋鮮鱈魚伴烤蕃茄香草」$250
鱈魚本身已很肥美，還要慢煮，完全可以想像到那股嫩滑。配搭蕃茄香草汁，多一分清新，少一分肥膩。
「原隻葡式烤乳豬」$1,350
看相片已知它的皮真的很脆，肉滿有油脂甘香，肥係肥咗啲，我都係暫時放低自己條人魚線先，食咗先講。。。
因為人多，我們點了三款飯類互相分享。「葡式焗鴨飯」$220
「龍蝦海鮮燴飯」$350
新菜「燒黑毛豬柳伴半蘑菇飯」$260
可能我份人較老餅。。。我還是最喜歡「葡式焗鴨飯」，飯粒充滿鴨肉香，再加上辣肉腸，好吃得我連吃兩碗。
最後甜品時間，兩款甜品轉眼已被同枱的女士們幹掉了。。。
幸好今次的亮點是新大廚親自做的「葡式蛋撻」，皮十分酥脆，香甜。話時話，印象中吃正宗葡撻是要下一些玉桂粉，不知我有沒有記錯呢？
這晚一班好友說說笑笑，吃得肚滿腸肥，吃完回家是時候要做掌上壓及 sit up，重拾返條人魚線了。。。
「Casa Lisboa」
地址：中環蘭桂坊德己立街55號 LKF Tower 8樓