每個人也有屬於自己的 comfort food，即是食完會令人很開心的東西，例如朱古力啦，士多啤梨啦之類。而小弟的 comfort food 就是。。。燈燈燈燉 - 燒賣！仲要是沒有肉的麵粉街邊燒賣，食完我就會好開心，所以我成日叫佢做「開心燒賣」！
今次為咗呢篇文，都用咗歷時成個月去食唔同燒賣與醬汁的配搭，睇吓邊一種最正斗。好，去片！(括號內的是美味開心指數)
1. 加豉油、辣椒油 (2.5/5)
最正規的食法，大家都食得多啦，不用 comment了，開始食到悶悶地。
2. 加練奶、茄汁 (1/5)
這是阿姐的推介，話練奶與茄汁的比例要 2:1 最好味喎。。。但係我覺得呢個唔得，好怪！可能剩係加練奶味道會好啲，似吃蒸的饅頭。
3. 加茶葉蛋汁 (4/5)
其實在「鴻福堂」，如果食厭左加豉油、辣椒油，我自己會叫店員落茶葉蛋汁，冇咁鹹之餘亦會多一份鹵水香，大家可以試試！
4. 加咖喱汁 (4.5/5)
這是我最近的新歡！最喜歡是在奧海城三期對出的一個小店，之前已經介紹過它自家製的咖喱汁，又香又有辣勁，食完可以整返杯西瓜汁。
5. 加甜醬、辣椒醬(2.5/5)
辣椒醬是腸粉那一種，味道也的確幾似吃腸粉的，合格。
6. 加出前一丁麻油 (4.5/5)
出乎意料地好夾！當然這是可遇不可求。。。那次我見到店有兩包麻油，請店員幫我加入燒賣裏面，走豉油，麻油的香氣會跟隨燒賣的熱力散發，得！
7. 加沙律醬 (3/5)
其實是好吃的，味道似是吃 Fish & Chips 的魚肉，同埋都要好睇燒賣本身的質素，如果燒賣蒸得軟熟，效果會不錯。
8. 加滷水汁 (2/5)
這次可能是滷水汁本身不夠味的問題，鹹味不足，甜味有餘，失敗例子！
9. 加余均益 (3/5)
辣椒醬中的典範及集體回憶，辣之中又酸酸哋，不怪的。
10. 加喼汁 (5/5)
冇得傾，壓軸的一定是我最喜愛的配搭，有留意開我Facebook的朋友都知道我經常吃這個。查實我懷疑我是喜歡吃喼汁，用來點甚麼也不是太重要？！
各位，咁你的 Comfort Food又是甚麼呢?