早幾日約了公關好友 C 小姐出來交換手信，在尖沙咀厚福街這條食街等。我早到，橫豎未夠鐘又未食晏，就純屬路過此粥店醫肚，食個快飯。
既然坐低，即管試吓。除了腸粉、生滾粥之外，仲有一般茶餐廳的三文治、碟頭飯之類選擇，大部份食客都是吃前一類。
這邊大叫一碗「擺尾」(即生滾魚尾粥)，那邊一碟「牛腸少色」(蒸牛肉腸粉少豉油)，幾有本土感覺。
服務應該不能說是好，環境普通，卻都是能接受的範圍內，也沒有什麼特別不愉快的感受，也許要為他們平反一下。
皮薄而滑是腸粉好吃的重點。此腸粉皮雖不及傳統廣州布拉腸粉的那種薄，質素已相當不錯，新鮮熱辣。
本來想另叫碗生牛粥，後來改變主意要了「豬紅粥」$24
嚴格來講它不算是生滾，因為豬紅本身已熟，下次大家可以選一些生料如肉丸、魚腩等，滾出來粥底味道可能會更鮮。
我這個還好，有蔥絲、薑絲，白粥底蠻軟綿，我落了激多胡椒粉一齊食，爽，啱晒冬天 feel。美中不足是粥底落咗味精，算是我可忍受的。其實它可以自信啲，完全唔落味精，只要生料靚，滾出來的粥自然鮮味，無謂浪費軟綿的粥底。
食完埋單，感覺還好，始終即蒸自家製腸粉已買少見少。一出來就看見 C小姐，立刻聚舊一番 XDDD
「洪利粥店」
地址︰尖沙咀厚福街2號A
電話︰2721 6606
營業時間︰06:30-02:00