分享一下四月在 RTHK 1 開咪做的「開心日報」，今集拍檔有蘭子、Ada、桂林哥，主題是「越南米紙料理」。
大家都說現在天氣已開始覺熱，當日桂林哥報天氣就已是氣溫29 度，蘭子說天氣翳焗到要開冷氣了。
所以 Ada 說得對，天氣熱，大家都會想食啲酸酸咪咪開胃的食物，例如越南食品。食越南嘢除了生牛河、撈檬、炸春卷，牛油雞翼之外，亦有一些健康又醒胃的選擇，例如今日介紹的米紙料理系列。
先來個傳統一點的「心裏美蘿蔔米紙卷」
雪白外皮包着羅馬生菜、青瓜、扎肉、同埋心裏美蘿蔔，點魚露花生醬食。蘭子說「魚露」感覺很性感，例如名稱叫夢露、露露等等的女士，所以今集我就幫佢改咗個花名叫「性感露露」喇 XD
其實越南菜多使用魚露、醬油、香草、新鮮蔬菜，食物也會檸檬草、青檸等調味。心裏美蘿蔔削走淺綠色的外皮，就會見到粉紅色的果肉，正因為顏色漂亮而得名。內外兼備的心裏美蘿蔔營養豐富，食落爽脆沒苦澀味，水分少而纖維多，能夠幫助消化及排毒，花青素亦有抗氧化及增強免疫力等功效，它亦令此菜式口感更豐富。
被桂林哥取笑我口大，一啖吃到這個的「脆米紙酸瓜薄餅」XD
它是將當地人最愛的街頭小食「越南薄餅」Bánh Tráng Nướng 改良，把米紙餅底炸至香脆鬆化，重新配搭配料如越南香腸等。
桂林和 Ada 都對越南香腸覺得有趣，我覺得味道有些似法國的血腸，或者似蘭子說的 Salami 家族，始終越南曾經是法國的殖民地，香腸都帶些「歐洲」風味。
薄餅上面放上自己家醃漬酸瓜、檳榔葉、青瓜絲、蘿蔔絲等等，加蛋黃醬和拉差辣醬，吃下去味道豐富多元，酸、甜、鹹互相融合。洗乾淨隻手揸嚟食，投入感更高！
桂林和 Ada 都對以下這個小煎堆覺得興趣，這個叫「街頭蟹肉醬脆米球」
它也是越南街頭會見到的小吃，側邊幾個炸咗嘅米波波，師傅將圓形嘅米球好似煎堆咁炸到中間空心，然後剪開上面開個天窗。
中間是用越南肉蟹起肉，加入酸瓜、蘿蔔、蛋黃醬造成的餡料，釀滿個波波，然後就一啖食，香口得來也適合配啤酒。Ada 問口感是煙煙韌韌還是脆卜卜，其實就好似蘭子咁，索女脆卜卜囉 XD
主食就有「金不換高樓米塔」，它不是米紙，而是桂林哥估中的越南米粉！把米粉炸至脆口後疊高，放上香葉金不換、越南香腸等材料：
吃前淋上以用海鮮、香茅、青檸葉等製成的濃湯，這個汁正如 Ada 說是整個菜的靈魂：
淋汁之後呢座白色小山丘就會塌下來，營造視覺效果，然後將米粉和汁撈埋一齊食，簡單清香醒胃：
最後一個是「五香豬腩肉鍋巴」
其實越南南部菜餚在歷史上受到中國南方移民和法國殖民者的影響，南方人喜歡帶甜味的菜餚，且比起其他地區而言使用更多種類的香草，亦都有些中國菜特色，就正如這個。
墊底的新鮮炸起的鍋巴，上面放了一件炆好的豬腩肉，肥而不膩，配上香脆嘅鍋巴，豬油香融入當中，間唔中放縱一次吧 :p
我哋幾位已經約咗一齊去食呢餐飯啦！充滿笑聲的一集，今集節目重溫：
https://www.rthk.hk/radio/radio1/programme/happydaily/episode/741174
大家繼續多多支持 FM92.6-94.4 RTHK 1 ，逢星期一至五，朝朝十點四，「開心日報」，下集見！👋🏻
