執筆之時，剛剛在星期一吃了一頓公司慶生飯，我們中午叫的都是小菜，埋單時原來該餐廳是中午及晚飯時段完全不收加一，而且它服務非常好，稍後另文再分享。
回歸生活小事一樁。承接前文，週日由澳門坐船回上環啦，到港大約 3:30pm，因為尚未食晏，就諗住在上環食啲嘢先。
通常一般去稍為亮麗的餐廳坐底食飯，約定俗成要加一，靚一點的服務就再俾貼士，香港人都慣了吧，有人 serve 你，公道。放眼世界，各處鄉村各處例，日本不收加一；美、加的侍應就靠人客貼士打賞作主要收入，一般都是 +10% to +15% 左右吧，各有不同文化。
店原是要㩒飛攞位排隊，卻已暫停使用：
我走入去，同店員講：「唔該一位。」
店員：「無㗎，呢度你要自己買飛揀嘢食，自己搵位座㗎。」
我 (天然呆了一秒)：「哦⋯⋯咁係咪要自己棒埋餐？」
店員答：「係啊！」
啫係門面係餐廳，實則係快餐店。咁觀乎全亮麗的餐廳都係得兩位服務員，一位在收銀，一位就是和我對話那位，人手甚凋零：
叫了個 7號餐，承惠 HK$38。買完飛，自己出去攞餐。
真心唔難食，調味是麻比辣強，不會辣在皮毛，在沒期望下反而不錯：
「牛丸湯河粉」，賣相算幾靚仔：
牛丸不是 cheap 貨，不是有粉無肉之流，也具爽彈感：
最後「熱咖啡」
食完之後，有手尾的下午茶食客，會自動將餐具放置中央位置才離去，當日甚多人也有這方面的「公民」意識。餐廳不收加一服務費，食客做多少少嘢，不是什麼大不了的付出，也可幫輕店員的工作負擔。
最後睇番張單，原來是某大餐飲集團旗下的餐廳。
我不知道「免收加一服務費」會否成為趨勢，作為吸引顧客的招徠，或者減省人手成本的一招。
誰又會有預知未來的水晶球？或許這已經是收費轉型 2.0 的年代 (當然會否因此而炒掉多餘的工作人員是另一個值得深思的課題)。不過在香港這個經濟嚴峻時間，一人做多一步，鼓勵消費，不論收唔收加一，能提高眾食客的自律感，習慣有首有尾，不會一味大安旨意指指點點等人服侍。換個角度來講，未嘗不是一個更貼地的通識教育，對嗎？
「明谷」
地址：上環干諾道中168至200號信德中心2樓278號舖
電話：2259 5008
營業時間：星期一至日 7:30am - 21:30pm