前豐州水產：一代艷星的隕落？

仲有冇人記得「豐州水產海鮮丼專門店」？即係喺灣仔曾幾何時，主打築地市場直送魚穫，好長人龍排晒隊嗰間。我仲記得前年生日，博客好友們請我去灣仔店食飯慶祝，仲做埋直播，感覺不錯，出品和服務也甚專業 (相關舊文)。

上星期同港台 DJ 聲爺慶祝生日，食日本嘢。上網睇，原來「豐州水產」已關門大吉，或改了名做「246」，所有食物都係賣 $20 $40 $60，因而命名，哦。

門口侍應相當有霸氣，就算唔人齊入座，每枱都只限時用餐 90 分鐘，我仲以為去錯限時放題店㖭。不過根據今次體驗，在週六黃金晚飯時段都大把吉位。會否自視過高？？

店的硬件都保留了「豐州水產」遺物，例如廁所鎖匙扣、牆壁上的畫。整體感覺像是光環掉了下來，艷光不再。。。

原來依家「丼飯」好似車仔麵咁，可以自由揀選配料：

這理念我是有所保留。若果「丼」是吃日本料理的一種文化，食材的配搭就包含傳統智慧和廚師的心思。「親子丼」是一剛一柔，「黑鮪丼」可純正品嚐吞拿魚的鮮美甘香，若任人自由配搭變成「車仔丼」就缺了點深度，同我去百佳買堆刺身回家放在飯上無兩樣。正如傳統「天婦羅」，縱使你有幾鍾意食「廚師牌腸仔」，也不會拿來做 tempura，若然你仍尊重該國飲食文化的話。

整體食物算賣得平，咁一分錢一分貨，唔好妄想會「超值」，反而出品令人感覺甚「cheap」(恕我用這個字，因為貼切)。

用「日本城」膠碟上的「豆腐蕃茄沙律」$20，中間有 basil，切到勁大件。其實不難吃，下了超市買那類支裝酸味沙律汁調味，卻實在太難夾起，食得很狼狽：

「火炙三文魚壽司」$20 /「火炙油甘魚壽司」$20 / 「黑鮪赤身」$40，迴轉壽司質素：

「三文魚子軍艦」$80 / 件，咦？乜唔係全場 $20 $40 $60 咩？

味道正常，也具鮮味，但在這 MK feel 的地方賣中環價一件，就顯得格格不入。我寧願你放少啲魚子，賣 $40 件，喜歡吃的人就叫兩件，好過而家感覺「高不成低不就」。

「牛油果軟殼蟹卷」$40。侍應執碟時倒瀉哂啲汁落呢碟嘢度，要成碟換過。我本人最終沒有吃：

「芝士炸蝦卷」$40

「芝士飛魚子紫菜杯」$40 / 2 件，「蔥花黑鮪腹身魚腩紫菜杯」$80 / 2 件

將紫菜剪成蛋糕杯，內放壽司飯及各項材料，可謂完全體現了港日混血兒的四不像，古靈精怪。

此店現增添了熟食的選擇，可惜都煮得很糟，一係好鹹，一係好淡。無味的「清酒煮藍青口」$40，堅似白烚：

以下呢兩個調味都很淡，「和牛筋大根煮」$60

賣相娟好的「A4 和牛稻庭烏東」$60

其實煮時落返啲鹽吊味，效果就會喚然一新，現在浪費了好食材。

牛舌叫了兩款，都鹹到飛街。「鐵板黑椒蔥花牛脷」$40

「燒牛脷」$20 / 串，非常韌：

另一鹹到天邊盡頭的「鐵板芝士煙肉炒菠菜」$20，廚師輸了馬嗎？同埋無咁多料，就唔好用咁大隻鐵板啦。。。

以下兩個我都沒有碰，「章魚燒」$20

不知名的魚干 $20，係咪包裝「鱈魚」零食嚟㗎。。。

最早落單，卻珊珊來遲的「A4和牛壽喜燒」$60

加了 $20 配手打稻庭烏冬，算是全晚我最喜愛，值點：

求變有時是好事，想打造日本風的「庶民食堂」，應該不是這樣行。由店名、裝修、服務、食物出品均有股隔著 Mon 都聞到的低俗味，只好嘆句「一蟹不如一蟹」。

Any 肥，祝壽星牛一怏樂，節目收聽率爆燈，繼續玩遍全世界！XD


「246 食堂」
地址：油麻地彌敦道558至560號譽發廣場一樓
電話：2869 6289
營業時間：12:00-23:00

若你喜歡此部落格，也請你 like 一 like，感激！

https://www.facebook.com/siuyeahdragon