話說我住的地方附近就是「Novetel Citygate Hotel」，行過去10分鐘左右，而且也是每天去搭地鐵必經之路，每天來回都會見到這熟悉的酒店。
這裏的自助餐已經食過 Infinitely 咁多次，價錢出晒名是平到天邊的盡頭。星期一至五中午人均 $165，星期六、日 $207，我和家人常來吃的原因是唔想喺屋企煮飯，嚟呢度食方便之餘，分分鐘仲平過自己買餸煮 XD
早前因為疫情，此酒店轉了做防疫酒店，全線關門，禁止任何 walk-in 或光顧，竟然令我有些少失落感。。。
現在疫情叫做過去，酒店大堂的自助餐亦回復正常，正在做「日本美食」主題。幾年沒來，有天星期五和家人去吃中午自助餐作午飯，價錢漲價到人均 $203。Anyway，我覺仍是很划算，我上班中午去飲茶都要每人百幾蚊啦。
冷盤
約有十數款，大路的都齊備，有火腿 cold cut、煙鴨胸、新鮮蔬菜沙律、芝士區域、蔬菜條等等：
剌身及凍海鮮類，是比較弱的一環。刺身有三文魚、𩶘魚、吞拿魚等。海鮮就有翡翠螺、藍青口、凍蝦等，花款較少。始終收費相宜，我也不會要求選擇苛刻：
配合日式主題，有各款壽司 (有些無影相)、卷物、冷麵、木魚凍豆腐等：
熱盤
選擇非常之多，大部份都切合日式主題，平均味道也好，有些喜出望外喎，逐樣逐樣來。「高湯茶碗蒸」，以大堆頭製作來說，蒸得相當滑：
「磯焼き帆立貝」
即場製作甚吸引眼球，亦相當受食客歡迎：
我吃了兩件，它主要用帆立貝自己的汁，再塗少許日本麵豉吊味，燒熟而成，效果不錯：
另一邊吸引注意的就是「日式串焼き」
串燒雞肉、雞軟骨、鰻魚、雞腎、日本番薯仔、甜椒、冬菇、燒菠蘿等等等等⋯⋯，一字型排開列陣，幾壯觀，也能挑起食慾：
各款試了一些，我最喜歡雞軟骨和菠蘿，菠蘿經過燒烤的洗禮有更加甜：
「揚物」、「燒三文魚鮫」
「章魚小丸子」，上面鋪滿木魚及芥末沙律汁：
可能我太耐無食過「章魚小丸子」這小東西，我覺得幾香口惹味，芥末沙律汁有將它的分數提高：
「日式炒豚肉」、「京蔥炆豬手」、「麵豉蘿蔔炆牛肋條」、「照燒雞扒」
牛肋條和蘿蔔炆得非常入味：
雞扒仍能鎖住肉汁：
我最喜歡炆豬手，一吃輕易地骨肉分離，皮滿有骨膠原，肉也滑，用來配「櫻花蝦炒飯」，整體甚匹配：
「關東煮 おでん」，一大盤有蘿蔔、雞蛋、芋絲、竹崙卷、日本魚片等：
味道均好，蘿蔔入味無渣，收貨：
另一角落為粉麵區，這天專做「日式醬油牛肉拉麵」：
湯底做得不錯，令成碗麵加晒分，這點抵讚，而且是無限量供應啊：
其他食物隨影：
甜品
有朱古力噴泉、各款蛋糕、葡撻、水果等，都整得幾靚仔：
我吃了豆腐花，甚具豆香：
新鮮菠蘿及哈密瓜片，這些我在屋企很少買來吃，冰凍清甜：
還有數款口味 Môvenpick 雪糕：
正所謂「大件夾抵食，慳水又慳力」，今回食物水準有提升，我吃完這餐是飽到晚餐都不用吃了，抵哂。其實世界太多紛爭，有能力選擇自己想吃的已經很幸福；只要和家人吃得開心，做人一樂也就很好了啦！:-)
「Essence」
地址 : 東涌文東路51號諾富特東薈城酒店大堂
電話 : 3602 8808
開放時間：星期一至日 12:00-14:30, 18:30-21:30