合作企劃

2021年9月19日星期日

《港台節目》開心日報:中秋菜式:團圓冬瓜盅 / 蝦子炆柚皮

分享一下今個月在 RTHK 1 開咪做的「開心日報」,今集拍檔有蘭子、Ada、桂林哥,主題是「中秋菜式:團圓冬瓜盅 / 蝦子炆柚皮」。


做節目的時候,還有兩個多星期就到中秋,文章見面時亦是中秋前夕。今次分享兩味餸菜,都是傳統應節美食,亦富象徵團圓之意,就分享來開心一下,一於食住慶節做節目!

兩味餸菜都是最近吃的。先講「團圓冬瓜盅

「冬瓜盅」似乎比較適合盛夏飲用,其實它的當造期去到年尾,講真現時天氣未算太涼,即使不需消暑,當作袪水腫、養顏的湯水飲用也很不錯,清甜味美。

一上桌未看內裡有什麼東東,已被它的鋸齒花邊吸引。我今次食呢個是最常見的「八寶」冬瓜盅,八寶指8款材料,有雞腎、田雞、火鴨肉、草菇、鮮蓮子、竹笙、鮮百合和夜香花。Ada 問到田雞的作用,我分享最近有兩次機會吃不同的冬瓜盅,發覺有落田雞的版本是鮮甜得多!當然近年很多更增添海鮮,提升冬瓜的鮮味,始終都是各師各法,豐儉由人。

講吓歷史,唔好以為「瓜瓜聲」不好意頭,原來以前它多在喜節慶日中登場,別名叫「燉金盅」,我同蘭子講,聽落唔好以為係韓國靚仔明星 Oppa 嘅名 XD 它也是婚宴常見的菜式之一,桂林哥話以前每個冬瓜重逾幾十斤,每個可供成枱12人食。當然,大冬瓜盅製作繁複,光是蒸軟冬瓜便得花數小時,現在也逐漸少見原個正宗燉出來的大冬瓜盅。

如果各位想在屋企做冬瓜盅,貼士是在街市買個迷你冬瓜,小冬瓜有圓也有長的,可以買圓圓扁扁,口夠闊,方便放入材料和勺湯。快速的做法是把它切去頂部,起囊刮肉,再跟其他材料先煮湯,同一時間先把冬瓜蒸15分鐘至腍,再放入煮好的湯料再蒸,便能省掉不少時間。當然,這樣分開煮不會嘥爐火,卻始終不夠原汁原味。而家年代乜嘢都講求快靚正 XD

第二味介紹的「蝦子炆柚皮」,Ada 話佢爸爸以前成日會食,蘭子就話佢都鍾意食炆柚皮。

呢味懷舊中秋節應節菜,我想主要是中秋大家都會食柚子 / 沙田柚,呢個可以話係循環再用的美食,反正柚皮都是免費的。這碟是柚皮鬆化,沒有苦澀味,好似海綿咁吸收蠔油醬汁,蝦子帶來鮮味,不過我個人就略嫌不夠多;另外加上炆得軟腍的鵝掌,mui 兩 mui 就可以吐骨頭出來,入味。

我今次食呢個廚師是用圓形的泰國紅肉「青柚」,臀部比較大,厚身無渣,通常是提供給酒樓使用,而不是一般的用沙田柚,不會有根及少苦澀味。師傅將柚皮用豬油弄製,因為柚皮是「瘦物」,沒有豬油是做不到鬆化的效果,也不會有獨特的香味。而去苦澀味,一個重要的竅門,就是浸水搾水這步驟,要用數天。然後將柚片放入油鑊中炸約幾分鐘,再用魚骨、豬肉、豬骨、乾瑤柱、蝦米、大地魚等材料熬製湯底,慢火炆煨柚皮。要是入口即溶,就要加多一點豬油,煨 5小時,最後配蠔油炆及蝦籽食用。。。我都係呢個理念,呢啲繁複菜式,都係出街食好過自己煮!

桂林哥話依家少咗地方有柚皮食,這個可以理解,因為一來整理繁複,二來又未必賣到好價錢,所以如果有地方吃到這個,要好好珍惜了。

好喇,開心時間過得特別快,祝大家有個團團圓圓嘅中秋節。今集節目重溫:

https://www.rthk.hk/radio/radio1/programme/happydaily/episode/769831

大家繼續多多支持 FM92.6-94.4 RTHK 1 ,逢星期一至五,朝朝十點四,「開心日報」,下集見!👋🏻




若你喜歡此
部落格,也請你 like 一 like 和 follow,感激!

沒有留言:

發佈留言

Related Posts Plugin for WordPress, Blogger...