咳咳。。。又講遠咗，今日唔係想聊叉燒。話時話，燒味中我比較少點的可算是燒鵝，因為通常不論係飯盒定係出街食，都好難食到熱辣辣的脆皮燒鵝。
至於中環那間名人飯堂燒鵝名店，作為港人甚至遊客，就算未吃過都可能聽過，當年爭產案上過頭版，曾成為大家茶餘飯後的話題。
個人覺得那裡的燒鵝無啥特別，識食一定會揀佢個「清湯蘿蔔牛腩」(一定要預先留訂) 同半肥瘦叉，可口一千倍。
上星期慶祝好友林柏希生日，呢餐絕對不是但，訂了尖沙咀的「裕鵝莊」食中菜，估不到有驚喜。
小吃「冰鎮芥蘭」$46
芥蘭梗已切丁，只保留嫩綠清脆的部份，用冰鎮著，食落冰涼爽口。若你喜歡重口味，可以點配上的豉油 Wasabi。
「懷舊炸鮮奶」$88
標明用北海道3.6牛乳，有點像將傳統順德菜活化。先唔講甚麼奶味濃郁這些行話，要一讚是外皮炸得超級酥脆，係鬆化到一個點！而且不油膩，絕不比大牌檔鑊氣油炸小食遜色，這點有驚喜。原來這是其中一位師傅用20年前在中菜廳學到的炸功，將主角改為牛奶，非常討喜：
裏面就是軟腍腍的牛奶餡，滑嘟嘟，不太甜，雖不太合送飯，卻是前菜或伴酒小吃的好選擇。值得一點！
來到指定動作叫碟「燒鵝」例牌 $160，如果叫「下庄」就$190。
這天走運，得到了「下庄」鵝髀位，好耐無食過熱辣辣的脆皮燒鵝喇：
餐選用90日大清遠黑鬃鵝，每隻重9-10斤，用明火燒烤，燒鵝確是就皮脆、甘香、肉嫩。油潤的鵝皮下有一層脂肪，有股獨特脂香，鵝肉雖未誇張到見到肉汁流出來，食落卻是相當肉汁豐盈。
而且我喜歡它連鵝骨也很入味，帶股鹹勁及鵝羶香，可以不用點酸梅醬吃，品嚐它的原汁原味味已夠。
「新鮮菠蘿咕嚕肉」$108
我們見隔離枱點了這個菜，顏值度甚高，就來一份吧。師傅將新鮮菠蘿打橫切一個圓圈，作為擺盤，中間放新鮮炒起的咕嚕肉、菠蘿及合桃等：
我覺得它做法刻意減少了醋的份量，主要用菠蘿及茄汁去帶動酸味，用新鮮腩肉上粉即叫即炸。一般廣東菜汁醬多，想用汁去吊起食物的味道，要做到「收汁」及「掛汁」的效果就看易做難。「掛汁」就是獻汁全黏在食物上，夾起會拉絲而不留在碟底，要有鑊氣及廚師夠快手。而它咕嚕肉的粉同漿上得夠薄，加上相信是快炒，能做到外脆內軟，有賣相也有內涵。
最後有甜品生日蛋糕：
祝壽星身體健康，今年飲食生意興隆，接多啲 jobs！大家若果無時間入新界食燒鵝，不妨可以考慮來這裏。
「裕鵝莊」
地址：尖沙咀亞士厘道37號九龍中心地下C號舖
電話：2387 1133
營業時間：星期一至日 11:00-23:00