咁正路，多數係「一樂燒鵝」同「再興叉燒」啦 XD
我覺得這兩老店像兩兄弟，地方麻甩，服務一般，卻各自有出名的燒味，到現在仍有不少舊街坊捧場客。也不怕你有選擇困難症，諗唔到食咩，每店各自選返燒鵝同叉燒就行，定位清晰，各有各聞名。
這兩店都是我上班中午食晏經常去過的地方。記得初出茅廬十幾年前 (?!) 在灣仔返工，就經常去「再興」食叉燒飯加例湯，有任落燒味汁，年少時覺得好開心滋味，原來以前快樂好容易，哈哈！
到後來在中環上班，就常去「一樂燒鵝」食午餐，由舊舖食到現在搬了位的新店，個人覺得出品比中環那間出名食燒鵝，做遊客生意的名店好味更多；如去該名店小弟一定不會叫乾柴柴的燒鵝，它的清湯腩及半肥瘦叉燒更得我歡心 (可惜清湯腩經常好早賣晒，訂位時一定要預留)。
這天中午來「一樂」重溫一下美味的「燒鵝瀨」$60，一樂也：
見到五顏六色的筷子，任配，很有懷舊感：
以前和同事兩個人食，我會單叫一碟下庄，另叫瀨粉。原來依家一碟下庄已漲價到 $180 了。。。
今天燒鵝得到背脊部份，放入口「妹下妹下」，又食到那陣鹹、騷、香的美味：
喜歡的話可以點酸梅醬增添風味，食落無咁油膩：
今回中午一個人怕食唔晒，就咁單叫一碗，沒有任何要求。我喜歡飲佢充滿燒鵝油脂的湯，有無人有同感？
對於一個唔識揸筷子嘅人，食瀨粉是一件困難的事，搵我做瀨粉代言人就慘了，哈！其實由細到大我在屋企都是用叉食飯的，只會在外面食飯用筷子：
店的牆上掛滿米芝蓮戰績：
仲有記得食燒鵝髀，記得食左髀啊！點解？之前分享過，可參考 相關舊文。
其實而家食燒鵝的地方已遍地開花，尤其是某數間連鎖燒鵝店，不斷擴張分店，吃過味道也不俗，例如荔枝柴燒鵝等，係情懷風味總是爭些少。
時移世易，眼見老店一間一間離場，更加要學懂珍惜。「一樂」開業於 1957年，據聞到現在每天也堅持只出爐十隻燒鵝。$60 一碗普通燒鵝瀨算唔算貴？怎算也不能說是便宜；若將回憶放進食物裏加乘，我還是會幫襯。始終今日唔知聽日事，而家餐飲業又難捱，這些美味老店情懷，別要愛得太遲。
「一樂燒鵝」
地址：中環士丹利街34-38號地下
電話：2524 3882
營業時間：星期一至六 10:00-22:30, 星期日休息，公眾假期 10:00-17:30