分享一下剛在 RTHK 1 開咪做的「開心日報」，今集拍檔有蘭子、桂林哥、Ada，主題是「大閘蟹粉菜式」。
秋風起，除了三蛇肥，還有老饕們最喜愛的 - 蟹，又到大閘蟹季節！
在座都是大閘蟹的粉絲，講這個題目都眉飛色舞。滋味的「蟹粉粉皮」配上海蔥油餅又會浮現在我䐉海。。。今年又怎會例外？
Ada 説今次介紹的蟹粉菜都幾特別。潮流興多花款，以蟹粉入饌的菜式也愈來愈多樣化及有新意，不會一味「蟹粉小籠包」、「蟹粉撈麵」走天涯，也要有新項目推出吸引顧客，所以今集主力講蟹粉做的有趣菜色。
先講吓今年的行情，依然是有好多大閘蟹放題或套餐，亦有網店外賣送貨到買家家裏自己蒸的「自家式放題」，甚至號稱「零死角」外賣，無遠弗屆天涯海角都送貨，競爭非常激烈。
今年除了陽澄湖，發覺多了日本空運大閘蟹，我自己就吃太湖的。如果外賣來講，$880 已經有10 隻四兩半，有公有乸亦可以混合，都幾爆膏。
桂林哥問到價格，其實今年市場上的大閘蟹整體供應量較去年增加，銷量除了明顯提升，價格亦有所回落，大約平 10% 左右。蘭子話佢最高紀錄係一次過食 13 隻大閘蟹，勁！
如果出嚟食放題的話，除了中式酒樓，而家甚至日本放題、台式餐廳等都包大閘蟹放題，最平見過 $388 / 位 食個半鐘，反應好壞參半，例如上得慢或者蟹膏麻麻多。咁等價交換，有 $800一位最多個半鐘食20隻 (要食得好快)，淨係一味得蟹，無其它菜式，我在社交媒體看到的相片質素不錯，蟹公蟹乸均都爆膏。
先介紹小食「蟹粉響鈴」
響鈴新鮮即炸，有點兒似春卷，索乾油後上碟，舗上蟹粉，作為小食。
蘭子話佢似響鈴，因為又索、又脆卜卜，所以大家今集都叫佢做「陳響鈴」同「陳索蘭」XD
拍檔們都同意現在的蟹粉，某程度上已經演化成調味品，像黑松露，可用來替食物增香增味。
我個人覺得這配搭不錯，送花雕酒可食唔停口，也應感興奮；吃時輕拌點淅醋提味，吃得蠻爽：
主食「蟹粉海參羹 - 沾麵」
大閘蟹粉撈麵大家就食得多，今次用有湯汁的類似日式沾麵形式奉上。
鮮味濃稠湯羹𥚃是蟹粉、蟹肉、瑤柱、海參條，都幾足料，可以先品嚐一下湯羹的味道，有少許膠質，相信女士們會瘋愛吧，另外眼見都有好多小朋友吃這個。
附上的中式扁麵條，用來浸入湯羹裏面再吃，不怕麵條發脹：
在秋涼日子喝這熱度十足的湯羹，夠暖身，之後記得飲薑茶啊。
之後就是 Ada 說很有創意的一道主食，「蟹粉配芫荽煎餅 / 薯條」
咁樣雙拼都係第一次見。我也比喻今時今日蟹粉也類似魚子醬，可以就咁食或放在克力架上品嚐。
食完成碟會覺得好飽，我就略嫌蟹粉醬份量不夠多，食到最尾唔夠點呢。
「陳索蘭」話如果俾佢揀的話，佢會將炸薯條轉做炸魚皮，用來點蟹粉醬吃，真的是膽固醇十分邪惡啊 XD
雖然這個雙拼組合有些半中不西，當日眼見就很受小朋友歡迎，始終有些小朋友不吃芫荽，會喜歡薯條嘛。
好喇，今集講到眉飛色舞，笑到肚痛！
節目重溫：
https://www.rthk.hk/radio/radio1/programme/happydaily/episode/781608
大家繼續多多支持 FM92.6-94.4 RTHK 1 ，逢星期一至五，朝朝十點四，「開心日報」，下集見！
