龍少爺 : 非常夏日 - 泰式肉碎生菜包

2018年8月7日星期二

旺角行人專用區「殺街」，在最後的週六，賣藝大媽們都來享受「最後一晚」的 spotlight，載歌載舞，真係「以後未來是個謎」。。。

我之後到旺角食飯，順便睇吓「殺街」後的情況，回歸平靜，因為戰場已轉去尖沙咀。

小小個人見解。我覺得行人專用區的所謂「表演」，已不是純 busking，是變成「自 high」唱 K，行過真係好嘈。我是支持政府要為表演者另覓合適地點及一定要進行規管，你估真係全世界都曉「自律」兩個字咩？如果唔係而家尖沙咀碼頭就唔使攪成咁：

(蘋果日報相片)

同埋有咩客觀方法分辨到真 • busking vs 自 high 自娛呢？？？我未識答。藝術嘅嘢，我識條鐵咩？這點似乎更重要，否則只會流於治標不治本。我諗最基本係要規管聲音的分貝，及每位 busker 的演出範圍？起碼唔好阻住途人同巴士上落客啦。

咳咳，又講遠咗。。。今日其實是想講旺角「菜街」附近的泰菜。除了「金滿象」(相關舊文)，今次的「阿來」，價錢走更相宜，即點即煮的路線。

「阿來」兩字其實是泰文「好食」的發音 (“來”要捲舌)，餐廳都幾開宗名義及有自信。

熱到 hihi，先來個冰凍「椰青」$35 解解暑：

「泰式生蝦刺身」$88

生蝦一直是我吃泰菜必點之物，喜歡它冰凍爽口的觸感，配辣椒、生蒜片提昇鮮味，再蘸辣汁，醒胃：

有個緊要的重點，就是蝦要非常清潔無怪味，否則食完肚仔痛就無謂啦，同聽完自 high 自娛的喇叭聲，耳仔痛一樣。。。我覺得它不論清潔和醒胃度都有做到，完全對我胃口。

「泰式肉碎生菜包」$68

將免治豬肉、檸檬葉、香茅、九層塔、辣椒、蔥頭、魚露等炒成香肉碎，再用附上清脆的唐生菜葉包來吃，味覺豐富，非常夏日。用手抓着吃，比用餐具吃來得更盡興：

(其實在泰國，此類炒肉碎通常會配飯吃或做沙律，較少用生菜包來吃，調味也不太一樣。)

侍應推薦的「泰式鐵板蠔仔蛋」$78，附上泰式辣醬及甜醬：

用燒熱鐵板奉上，令熱度得以保持，蠔仔飽滿、大粒、份量多，加埋炒蛋，成座小山丘咁高：

印像中好像第一次吃此味泰菜，新鮮炒起，蠻有滑蛋香，蠔亦鮮，無砂。吃時配甜辣醬，可以提香及增強味覺層次。

此店的整體出品我覺得不錯，另見隔離枱有叫「串燒沙爹」、「泰式豬手」、「飛天通菜」等都幾香、幾好樣。下回再來，可以食埋呢幾款。

下集再傾！

「阿來東南亞風味」

地址︰旺角廣華街38號 G/F

電話︰2618 6737

營業時間︰11:00-23:00

若你喜歡此部落格，也請你 like 一 like，感激！