熟悉我的朋友仔都知道我一向好鍾意食街頭「魚肉燒賣」，即係唔係響酒樓嗌點心有好多肉嗰種，魚肉燒賣真可說是我的 comfort food，每次有什麼不開心，只要整串魚肉燒賣就會變返做開心仔！我覺得發明「魚肉燒賣」嘅人應該要攞諾貝爾獎啊 XDDDD
而家食「魚肉燒賣」真係遍地開花，很多便利店都有。真心在「掃街小食」元宇宙入面，魚肉燒賣絕對是個奇妙的存在，「香港燒賣關注組」有 17萬+ followers，一粒原本平凡的東東，已昇華到得到大家喜愛同研究。香港人對燒賣的執着，早已超越「醫肚」層面啦，重點係好味又食得開心！
咁在小弟眼中何謂好食的「魚肉燒賣」？首先魚肉比例不能太少，不能是一舊粉糰。。。其次口感要煙韌彈牙，另外甜豉油或醬汁也是重要一環。有時見啲網友評論甚誇張，形容「粒燒賣會因醬汁而昇格」，實在又的確不能完全否定 : )
先講吓「鴻福堂」的魚肉燒賣 HK$16，而家已有甚多口味，例如芫荽、麻辣豬肉等等，真係成本低、收益高、又去貨快。我有時都會食吓，純粹因為分店多夠方便，同埋個杞子豉油調味不錯：
若平時在家想食魚肉燒賣，最方便的組合就是買一包「金龍」燒賣長備在家，蒸熟後加「鴻福堂」杞子豉油或麻辣豉油，真係完美地複製，而且有更加好吃！
「金龍」其實是香港老字號急凍點心批發商，以香港本地製造、大眼雞魚漿製作的燒賣出哂名，蒸熟後粒粒帶少少透明，質地煙韌，在家 DIY 來吃已很滿足：
第二間是油麻地「通達食店」，呢間好似我 20多年前讀書時已有幫襯，嗰時無記錯最出名應該係辣魚蛋，門口總是有一群食客在排隊。
之前我學結他，老師的 studio 就在附近，所以有時行過都會整返串魚肉燒賣。
聽聞此店好像就快結業，就來個魚肉燒賣、魚蛋、香滑腸粉三併 HK$46 堂食：
燒賣煙韌感一般，也不要講魚肉味，是澱粉口感；反而魚蛋辣汁同腸粉的芝麻醬、甜醬調味不錯，燒賣沾了醬汁有比較好味，如果現在單買一串魚肉燒賣加豉油食應該會若有所失。。。
第三間灣仔「腸粉皇」
又係由初出茅廬食到而家，在灣仔 VTC 出面，腸粉、燒賣、魚蛋三拼 HK$40，深受附近打工仔歡迎，大家買了都站在附近快手吃。燒賣皮薄口感煙韌 (似「金龍燒賣」），配合老闆娘毫不吝嗇的醬汁，整體感覺飽肚又滿足。不過燒賣 size 現在似偏細粒咗 ? ! 如果以主角來計，非常滑的腸粉先係這𥚃的真正強項，更大推，店名都有得你叫 XD
之後是中環蘭桂坊「十八座狗仔粉」魚肉燒賣，加魚蛋、辣椒油、菜脯：
價錢忘記了，好像 HK$30+，一向不算特別，叫做曾是「米芝蓮必比登推介」，多明星幫襯。魚肉燒賣最初原店好像是自己做 ? ! 可惜現在感覺變咗細細粒急凍粉團燒賣。。。加了辣椒油同菜脯吃，惹味度𨘻好。
啟德 Airside 「那個ㄋㄚˋ ㄍㄜ」，魚肉燒賣 HK$12 / 8粒
這台灣過江龍店竟有即蒸燒賣，可配自家製辣油、椒麻辣子或櫻花蝦辣椒調味，櫻花蝦辣中帶香，好得，大愛及大推！而且現在已有好幾間分店，算就腳：
我立刻 encore 食多一份。燒賣本身質素不錯，亦勝在新鮮熱辣調味配搭自由，適合貪新鮮的朋友仔。「台式烤腸」HK$10 亦是不錯配搭：
「包點先生」魚肉燒賣 HK$14
完全唔掂！質感硬及就是一粒粉團，唯一比較特別是佢用上潮州辣椒油，可能和其他點心同蒸飯一齊用吧，潮州辣椒油我覺得幾香口，其餘驚喜欠奉 sorry :
「原味家作」木耳魚肉燒賣，HK$15 / 6 粒
這連鎖店出品唔少朋友仔都有食過吧，我也經常幫襯，勝在地點夠方便，木耳爽口絕對有加分，口感不粉，不加任何調味醬料我覺得都好吃。另外當然真正令佢突圍而出就係任下的菜脯，有辣有唔辣，幾惹味，亦是特點，比「鴻福堂」均有更勝一籌！
鰂魚涌「K11 Atelier」旁邊的「新鳳凰餅店」，魚肉燒賣 HK$12 / 份
舊「鳳凰餅店」在鰂魚涌港鐵 C 出口有超過半世紀歷史，以平價新鮮出爐麵包聞名，蛋撻同火腿蛋包均是招牌；後來被迫遷到對面的現有位置。魚肉燒賣也是店受歡迎的小食，雖並非專門賣燒賣的店舖，質素不粉團，幾軟熟，自家調甜豉油味道也好，勝在夠平民大眾化及可順便買埋新鮮出爐麵包，推薦！
另外在「新鳳凰餅店」旁邊有另一間更古舊的傳統港式麵包店，除了麵包、蛋撻等最近也有賣「鯊魚肉燒賣」，價錢忘記了，味道麻麻 (同埋店的清潔程度可以更好一些)，在此不贅，post 個相作紀念：
紅磡「林記小食」，燒賣關注組力推的魚肉燒賣 HK$12 / 5粒
又是長龍店，燒賣自家製，聲稱每日現包再現蒸：
可能小弟當日運氣不夠好，蒸出來的燒賣中間不夠熱，外圍熟的地方質地軟韌適中，幾有魚肉香，卻又未至於特別去朝聖非吃不可那種。甜豉油調味則不錯，路過不妨一試，反而旁邊所謂「世一」的「周記醬料」魚肉燒賣就真的很想試，可惜當日來到未有開門，下次搵日再來！
尖沙咀「浩皓記」的豬腸粉、沙嗲汁、炸乾蔥碎、菜脯粒、陳皮魚蛋兩粒、魚肉燒賣兩粒，HK$46
一堆唔起眼嘅嘢撈埋一齊，簡單好味，炸乾蔥碎絕對有加分！來到一定要要食佢個濃郁沙嗲汁，好有洋蔥香，加上辣椒油後勁，均真講其實點其他東西都會好食。如果唔鍾意沙嗲，佢自家製香蔥豉油配燒賣腸粉魚蛋都正的：
另外佢有炸燒賣，之前看過好像是關注組力推的炸燒賣代表？我就沒試過。其實好食還好食，以這個價錢吃這一碗小東西，真的不能說很便宜，而且肥爆，間唔中吃一次便好了！
尖沙咀「餓媽家姐」，講開炸燒賣順便提埋呢間，個人覺得太乾，anyway 店原來已經關門大吉，又留個念吧：
除咗以上親身試過的店舖，以下幾間都在我的 pocket list / bucket list：觀塘「駿運士多」、大埔高峰期日賣 10,000粒魚肉燒賣的8 0歲叔叔自家手打魚肉燒賣「粉果佬」、長沙灣「金華美食」、石硤尾南山邨的手工包燒賣婆婆等等等等⋯⋯
魚肉燒賣，豐儉由人，講咗咁多，你又最鍾意邊間同埋有無好推介？唔好自私食，分享給大家好喎！
沒有留言:
發佈留言