中式餐廳圓枱多，適合大堆頭飯局，而且人多叫套餐，一向較經濟。
中環「寶湖」主打海鮮，以前成日來食晏，晚上來，最抵食就係叫海鮮套餐。
入內轉入大廳，就是大魚缸，似個迷你水族館：
今次挑了另一款 12人海鮮套餐 $2,488，免茶芥免加一全包。原本有龍蝦，可惜賣哂，唯有被轉了做大大蝦球。
小吃「燻蹄拼海蜇」、「椒鹽豆腐」
打頭陣的「大大乳豬」：
始終酒樓主打海鮮，乳豬屬尚可，芝麻皮我覺得可以做得更鬆脆。
海鮮先上「富貴大大蝦球」，青翠西蘭花圍掛橙色大蝦，蝦爽彈，醬是茄汁加喼汁，酸酸地，激活味蕾：
小炒海鮮，最緊要係乜？當然就係快手和夠鑊氣。「碧綠蚌片帶子」，鑊氣不賴，加了吊片起了提香作用，重點：
「果皮蒸鮮鮑魚」
現在鮑魚大、細、平、貴都有，吃鮮鮑仔應該算不上是遙不可及吧。用陳年果皮去蒸，配蒸魚豉油，味道合意。蒸新鮮海鮮，千萬不要落蒜蓉，拜託拜託！
「蟲草花煲雞腳螺頭」，堅多湯料及蟲草花：
蟲草花可助增強免疫力，性質平和，不寒不燥，算是近年的湯料大熱。難得湯頭無味精感，幾欣賞此餐廳不會整色整水，尊重食物原味。
「清蒸沙巴龍躉」
說過無數遍，出街食蒸魚以12至14両一條最穩陣，人多寧願蒸兩條。這條約14両，蒸得不錯，骨肉剛好分離，豉油亦無遮掩龍躉原有的鮮味。
個人無感的「蠔皇金錢扣玉掌」，不是我喜歡的菜類：
「脆皮燒雞」，稍為過了火：
飽肚之選竟然是「上湯水餃」：
一般結尾都是揚州炒飯、什麼乾燒伊麵啊之類，成本不高之物。相比起來，自包水餃是比較有誠意？！
埋尾的冰凍生果、甜品：
經驗值冇得呃， 海鮮款式質素仍係 keep 到，也是中環區少有經濟之店，食海鮮唔使吓吓山長水遠入離島啦。想食，隨時食；想做，就去做。做人快樂不該是這樣的嗎？XDDD
「寶湖海鮮酒家」
地址︰中環租庇利街1號喜訊大廈1-3樓
電話︰2850 6638
營業時間︰07:00 - 00:00