2020年7月9日星期四

 【五十年老店 (下集) 】人情味故事 - 芽菜仔炒魚鬆飯


上回講到這間由幾姊妹開了五十年的溫情老店「旺景工友食堂」,當時我寫下一句 //下次我會再來,食她們親自煮的食物,見證她們五十年即叫即煮的廚藝真章。// (相關舊文





男子漢講得出做得到,今次來找數 (押韻㗎)。今次特別再來,大概12:30pm,見到午餐有「梅菜蒸鯇魚」,想試真材實料食材點這個錯不了,坐低後立刻和那幾位姊妹老闆的其中一位老阿姨落單。



姨:「好的!」

點知2分鐘後阿姨笑着回答:「今日梅菜蒸鯇魚已經賣晒,你揀過第二樣!」

我:(驚訝)「咁早就賣晒?」

姨:「係呀今日鯇魚靚啊,同埋附近啲工人通常11點幾就食晏㗎。你揀過第二樣啦!」



我苦思良久,好像想不出另一樣想吃的客飯。

姨:「你想要咩吖?一係我炒碟魚鬆飯俾你食?」

我:「好呀,用咩炒?」



姨:「有菜心、芥蘭、芽菜仔,乜都得」

我:「咁芽菜啦!」

此乃真正中式「大廚發辦」,即點即炒!



例湯只簡單地在白板上寫著「節瓜湯」三個字 :



細問之下是「節瓜排骨煲赤小豆湯」,啲湯料重到影相要 NG:



完全無味精,堅好飲:



芽菜仔炒魚鬆飯


200% 家庭式媽媽風味,鯪魚肉餅條,鮮味彈牙無碎骨 (這點很重要 ! ):



芽菜仔爽口,很合夏天的胃納,獻汁也沒有如漿糊一般:



三扒兩撥我很快就食哂啲餸,剩下一些白飯在碟上。

姨:「我送啲牛肉俾你,爬埋啖飯啦」

我:(呆了一呆)「唔使啦,我飽啦。。。」

姨:「乖啦,我送俾你食」(佢真係咁講)

我:(盛情難卻)「好啦好啦,不過你計番錢啦」


姨姨收了我 $5,加了一堆「免治牛肉」在我碟上:



最後我又是很快食哂啲餸,剩下少許飯。

姨:(家人口吻)「吓?咁叫食哂咩?」

節儉是美德,姨姨這樣說有點令我尷尬。。。最後埋單 $53。



姨:「嗯,多謝靚仔」,親切的一句,她又繼續 serve 其他人客。

雖然這一頓不是什麼珍饈百味,不過那股人情味,相信現在已經碩果僅存吧?!大家要好好珍惜這情懷。在此也祝幾位阿姨們身體健康,開開心心!=)

#幾忙都想寫左呢篇先




「旺景工友食堂」
地址:新蒲崗大有街2號旺景工業大廈地下
電話:2320 7505
營業時間:從缺




若你喜歡此部落格,也請你 like 一 like,感激!

沒有留言:

發佈留言

Related Posts Plugin for WordPress, Blogger...