飲食業進入冰河時期，現在中午都盡量支持餐廳，晚上有機會就外賣，共渡時艱啦。
上星期為準備嚟緊的節目，到了太子「永興冰室」幫襯兼蒐集資料。
要吃的食物目標已鎖定，稍後再分享。如題，今次在餐廳竟然吃了一碗廣東雲吞 (去冰室食雲吞，想食咪叫囉)。。。Btw 你覺得雲吞大粒好定細粒好？
先利申，食雲呑 + 麵，我個人首選「何洪記」，間唔中經過中環威靈頓街，口痕都會食碗天價迷你「麥奀記」。
老字號雲吞麵，「散尾金魚」狀的雲呑要依足傳統方法弄製，墊於銀絲麵底內，一口一粒，鮮蝦味道濃郁；湯底要用上大地魚及蝦殼等熬製，更是整碗雲吞麵的靈魂，方為上品。
咁名牌子所謂老字號雲吞麵店，在港多的是，索價也不菲，尢其「麥」字派一系列各店；以前各「麥」店的雲呑麵能做到蝦爽，皮滑，幼麵彈牙，湯鮮等幾項條件，水準穩定。加上它的雲呑不會下太多豬油，吃起來是香而不膩，可惜現在部份「麥」字派已退步，之前寫過，不贅。
在此先點了西式「羅宋湯配焗豬」套餐 $68
整個套餐連湯，羅宋湯用上新鮮，有椰菜、番茄、芹菜、紅蘿蔔、薯仔、洋蔥等，蔬菜相落足料，吃得出是新鮮貨，芹菜、紅蘿蔔大條仍有咬口，茄膏也落足，以茶餐廳例湯來說已超水準：
食完之後見仲有少少餓，若有所失，就來一碗雲吞吧！落單後原來是自家包即叫即淥，要等約10分鐘。「淨雲呑」$39
散尾金魚狀的雲呑大小亦恰到好處，一口一粒的大小分量，皮薄餡足，外皮薄透，吃下去不會死實，這點令我有驚喜，估不到在冰室茶餐廳都吃到傳統手藝和口味。
因為新鮮淥起，有股燙嘴的暢快，沾點辣椒油更好提香。雲吞附送約半碗西生菜，配湯上面灑上的乾蔥及芹菜粒，香口又飽肚：
我覺得好吃雲吞的精粹不在 size 大，像蝦餃一口一粒剛剛好。「沾仔記」的大到乒乓波咁，兩三啖先KO，餡料跌出來，外層又散開，一來失去吃傳統雲吞的神粹﹐二來又會食到狼狽。。。
正所謂「百貨應百客」，大、小均有捧場客 (又押韻㗎)。你又喜歡那一種呢？
「永興冰室」
地址 : 旺角彌敦道776至778號恆利商業大廈地下
電話：2988 5566
營業時間：06:00-23:00