香港正處於大時代，餐飲、零售業銷售下跌等等的新聞，經常會看到。這令我想起《區區撐小店》此系列，是我吃過的店子 (非集團式，無大台)，又值得推介俾大家的。
其實寫了食咁多年，一直有機會在不同領域發展，我會想自己可以做多一點甚麼？若小弟可以付上少許筆墨，撐一撐良心小店，當替他們宣傳又好，幫他們渡過難關，盡做啦，我是很樂意。
好，今系列重新出發，就寫在「東薈城」隔離「富東商場」的小店叫「東涌七号」。
現在應該算是 2.0 年代吧，餐廳硬件跟以前差不多。開放式廚房換上了一位看似媽媽的廚師，出面侍應是位後生仔，似兩母子 (?!)，甚家庭式 home feel。
門面加了很多小菜張貼，貼地得多，我相信會比較接近街坊們口味，始終住宅區，都係一家大細人客為主。
上星期我行過駐足觀看，午餐時間無乜客 (其實座位都係得數個)。侍應少年走出來介紹我不同小菜，那位媽媽就叫我入嚟食嘢，咁我隨口點咗「咖喱牛腩」配碗銀針粉 $56，心態係入去醫肚。
點解我會叫佢 2.0 年代？我與那位媽媽傾計，原來店舖已易手，店名不變，她就做了老闆，增添不少家庭餸，都是無味精的。
此時少年突然放下一杯飲品，話係送俾所有人客的，是自家煲羅漢果水，這個在餐牌上沒有提到，有點驚喜，我即刻有禮地說謝謝：
味道天然甜，可歸類為無添加、少甜那種。而且是主動送給人客來滋潤一下啊，是人情味，那一刻的條件反射是覺得他們有心做好呢間食店。
炆牛腩來了，慣性手機食先，再吃了一件。跟著先腍起：「咦？我唔係叫咖喱牛腩咩？」
媽媽大廚見我有異樣，說：「啊，唔好意思，我幫你換過碟。」
「但係我已經食過喇喎。。。」
可以見到小店的大方與不拘小節。我當然沒有浪費食物，繼續吃這個「柱侯蘿蔔炆牛腩」。牛腩是用崩沙腩位，花椒、八角、柱侯落足，另吃得出加了果皮，幾有水準：
蘿蔔無渣，夠腍入味：
銀針粉有很多娃娃菜，也加了炸蒜吊香：
我見隔離兩位人客正在吃「水煮魚」，原來是另一名物，借來影了一張相，也不算貴：
伸延閱讀：
2017-08-07《區區撐小店》: 平民價吃手握壽司－玥屋
2017-04-18《區區撐小店》: 維記以外的豬潤麵－潤潤麵
2016-10-12《區區撐小店》: 午餐價錢晚餐享受 - 超大份羊架
「東涌七号」
地址：東涌富東街6號富東廣場地下7號舖
電話：2388 0612
營業時間：星期一至日 11:30-21:30