有些東西叫「一生一火花」，一生人能親身遇到一次已經無憾，例如親眼見到北極光，又例如親身現場睇娜姐，唔使再睇DVD。
呢兩日的話題都離不開麥當娜來開兩場「Madonna Rebel Heart Tour」香港站演唱會。娜姐真係紅足30年，我記得第一次買她的 cassette 帶是她第一隻 album，當時我是小六，仲記得個封面是黑白色，娜姐性感上陣波濤洶湧的樣子，Holiday 啊。
跟住到我初中，她的 hit songs 真係多到不得了。Material Girl, Vogue, Like A Virgin, Take A Bow, Cherish, La Isla Bonita, Like A Prayer... 可以話係街知巷聞的天后。今次演唱會她都有唱這些舊歌，反應明顯是全場起哄，尤其 Holiday, 證明這些集體回憶的光輝年代歌曲，是一世的經典。
今次有幸買到一張 $1,888 的飛，冇辦法之下就自己一個睇啦。由於演唱會地點是機場附近的「亞洲博覽館」，附近也沒有什麼好吃，就乾脆到青衣城隨便找個吃的算。找到「So Thai So Good」，價錢不太貴，味道還好，而且用東亞信用卡好像是消費＄400 減＄100，難怪當日滿座。唔知有幾多人是到時去睇演唱會的呢？
「燒豬肋骨配薯條」$80，豬肋骨是先用清水煮熟才去焗，可惜不是由生焗到熟，因為輕輕一切，肉就與欲骨分離了，預咗。
「香蒜芥蘭」$48，簡簡單單這個最好味！
「菠蘿炒飯伴燒雞」$90，燒雞只有三小件，好像與餐牌上的圖片不符。。。不過不緊要啦，炒飯比燒雞好吃。
「燒西冷牛泰式辣汁糯米飯」$98
食完飯都已經八點鐘，而開 show 時間也是八點，反正大家都知她是例遲，我們這時才搭機場快線去博覽館，仍然有大把興奮的入場觀眾同車。
入到場約九點鐘，見到些圈內及有些DJ朋友，打個招呼後就匆匆入場，沒有睇展覽。
今次我的座位在 G/F，正正在 Control Panel 右手邊路口位，可以話係對正個台！在等候期間，照樣由DJ Mary Mac 打碟播歌 warm up。
播播下英文歌，心情是在等待主角出場，突然間響起熟悉的鋼琴聲 -「海闊天空」，全首歌由家駒主唱，起初是驚訝，然後大家都開着手機的燈在揮手，全場熄燈一邊和唱，那一刻有股莫名其妙的感動，覺得這是麥當娜送給香港人的禮物。驚喜位！
等到十點二十分，正式開 show。連續兩個鐘頭又唱又跳，舞台效果、舞蹈演出及視覺效果都精彩，依然是高水準的製作，相信大家近日在Facebook及媒體上都已被洗版。在我來說，觀眾是樂在其中，又唱又跳又笑，絕對值回票價，天后就是有這股魅力！！！無憾。
唯一要彈的是場地交通配套，散場時是晚上12點半，簡直是惡夢，人多而且是混亂，又冇地鐵返屋企 (我只是住在大嶼山！)，的士站又打蛇餅，好彩我call到的士，要去青衣先搭到車返屋企，搭左＄150，有車已經好好了。如果香港真係想發展成一個國際級演藝場地城市，單係紅館是不足夠，亞洲博覽館場地是不錯，但真係要好好諗下交通配套，如果唔係只會苦了一班觀眾！(我上次來亞洲博覽館睇王菲演唱會散場都是這樣混亂㖿)
「So Thai So Good」
地址：青衣青衣城3樓302號舖
電話：2433 0848