分享一下剛在 RTHK 1 開咪做的「開心日報」，今集拍檔有有蘭子、Ada、桂林哥，主題「大閘蟹粉點心」。
秋風送爽，又到大閘蟹季節，老饕們的最愛！大閘蟹時節到，再加上在座我們都是大閘蟹粉絲，每年講這題目都眉飛色舞。
所以中秋後，開始有大閘蟹食時最好就先食乸，膏最軟熟。到重陽節，即代表公乸都成熟，兩者都可以食；重陽節後一個月，公大閘蟹的白蟹膏最多，亦是最美味。
蘭子說現在是食大閘蟹乸的尾聲，之後就是到大閘蟹公亮麗的時候喇！
講吓2022 年江蘇大閘蟹的價格行情，價格大概比去年貴15% 至20%。雖然價錢貴咗，蟹膏卻相當不俗。
我今年第一蟹「清蒸大閘蟹公」(五両) ：
拆開時，已見蠻多蟹膏。除了黃，還有白身公蟹膏，膏清香，嗜膏之徒必定很愛。蟹膏細滑，輕伴浙醋同吃，甚齒頰留香。
蘭子說她上個星期一共吃了12隻大閘蟹，分兩晚每晚食六隻，蠻誇張！我覺得拆大閘蟹是一件幾攰的事，加上蘭子食埋蟹腳，加埋差唔多成百隻蟹腳 XD 佢又喜歡自己拆，不用「姐姐」幫手，勁！
以下介紹的蟹粉菜都蠻好吃。潮流興多花款，大閘蟹放題感覺已經有啲過氣感覺；以蟹粉入饌的菜式亦愈來愈多樣化及有新意，不會一味「蟹粉小籠包」、「蟹粉撈麵」走天涯，也要有新項目推出吸引顧客，所以今集主力講蟹粉做的特色菜色。
席前即蒸「蟹粉蝦餃、蟹粉燒賣」，每樣一粒：
將蟹粉融入廣東點心，Ada 問是在人客面前直接由生蒸到熟？對的，時間大約8分鐘：
先講蝦餃，師傅在蝦餃餡料已混入蟹粉，上面再放蟹粉，蒸熟後蝦餃裏面甚有湯汁：
蝦餃皮較煙韌，一咬同樣爆汁，亦比一般蟹粉小籠包來得特別：
蟹粉燒賣亦有驚喜，外貌像與普通燒賣無異，師傅放棄用半肥瘦豬肉，用了梅頭瘦肉部份與蟹粉混合是相當不錯的配搭，令之不會感覺太肥膩：
除了裏面有蟹粉的甘香，面頭再放鮮蟹粉，由內鮮到外，蒸到出晒蟹油：
而且也有做到 juicy 的效果，加上在眼前蒸熟即食，感覺衛生且新鮮：
桂林哥問咁在8分鐘等候期間有乜嘢做？就是吃這個大家熟悉的「蟹粉鍋巴」
喜歡它的樸實，不會浮誇地整色整水：
鍋巴一小塊新鮮即炸，索乾油後上碟，舗上多量蟹粉絕對是亮點。
用全蟹公的蟹膏，似調味品般增香增味。我個人覺得配搭不錯，趁脆吃，應感到興奮。
最後此午餐來個「蟹粉蟲草花蒸雞飯」，如果唔係 Ada 話可能男士會唔夠飽：
師傅先用蟹粉將飯炒底，加入蟲草花及雞件蒸熟，上枱前在飯上面放上蟹粉用來撈飯吃，學蘭子話齋真係「由頭蟹到尾」：
蟹粉因為先炒後蒸，再加 extra 喺面頭加持，飯底有非常重的蟹膏香：
蒸完之後熱辣辣更加散發香氣出來，完全唔使落甜豉油，直接品嚐蟹粉的天然甘香鮮味：
蟲草花其實可塑性甚高，今次用來蒸雞非常搭配，加添了藥膳的影子，也減少了吃太多蟹粉的違和感。
蟲草花性質平和，不寒不燥，含有豐富營養素，能止咳，提高免疫力。平常聽眾們可在家用它來煲湯，清甜滋潤又養生，價錢也不貴呢。
最後 Ada 都提一提各位聽眾，食咩都要適量，大閘蟹雖然美味，當中體質寒涼的人士要留意吓，最好配薑茶去中和返 XD
好喇，今集愈講愈滋味，節目重溫：
https://www.rthk.hk/radio/radio1/programme/happydaily/episode/847557
大家繼續多多支持 FM92.6-94.4 RTHK 1 ，逢星期一至五，朝朝十點四，「開心日報」，下集見！👋🏻
