分享一下剛在 RTHK 1 開咪做的「開心日報」，今集拍檔有 Ada、超人、忠哥，主題是「芫荽」。
三位拍檔都是愛吃芫荽之人，小弟就麻麻。今次帶咗啲小手信上來，就是芫荽味的餅乾條俾大家試吓，我都係嗰日第一次吃呢：
巧遇「旅遊樂園」的劉蓮：
節目開始前，標爺幫我地查咗芫荽的正確讀音，不是「鹽西」，而是「原衰」。不過俗語大家已經慣咗讀前者，如果唔係去到街市讀正音，可能個菜檔都唔知我想買乜 XD
開題時，超人就話呢個題目好勵志，因為做人千祈唔好做到好似芫荽咁。佢哋拍戲劇組食飯叫白切雞或霸皇雞，永遠都會先夾開面頭做陪襯的芫荽唔要，所以做人，一定要努力做到主角啊。
芫荽味道強烈，不是人人能接受，有些人卻極度鍾愛這種有個性的香味。今天呢個配角終於有出頭天，香港有不少餐廳推出芫荽味特濃的食物，吸引芫荽控們朝聖。第一味是「芫荽湯底車仔麵」
我選擇了粉絲做底，加豆腐卜、魷魚，然後廚師會放入特製的芫荽醬上湯，面層再加海量芫荽：
我食芫荽只是「BB級」接受程度。此車仔麵重點的芫茜湯底，沒有我想像中濃烈，一般人應該都接受到，加辣會更惹味。Ada 話呢個湯令佢諗起平時屋企滾開嘅「芫荽皮蛋魚片湯」，好味易整，又有清熱功效，呢一味浪湯相信不少聽眾在家裏都會經常做！
下一款是「芫荽滑蛋煙三文魚三文治」
而家三文治好興炒厚滑蛋，佢就加入咗芫荽，另外超人同 Ada 都覺得煙三文魚同芫荽會好夾，我食後感是的確不錯，整體食落無咁平淡。
好，我哋再向上挑戰，「芫荽雲南米線」
呢個係小鍋米線底，已有酸菜、肉粒、腐皮，另加 $5 可以加一味餸，例如菜心、蘿蔔，仲有芫荽。而家芫荽已經「升呢」成為一個蔬菜餸！Ada 話 $5 抵加，因為呢碗芫荽多到係有成部手提電話咁高！
個人覺得最勁芫荽味是這個，因為未煮過，草青味最勁；而且超人同忠哥話生芫荽會污糟，因為好少會洗同難清理，洗完會無晒香氣同埋變晒樣。。。所以食呢味，大家都要考慮呢點喇。
大堆頭的「芫荽山火鍋」
芫荽素來都是火鍋的常用食材，例如「芫荽皮蛋湯底」。呢個就是一口氣呈上四種不同湯底：清湯牛腩、喇沙、麻辣、蕃茄薯仔豬骨湯。更重要是在中間加墊上冬瓜片及超勁量芫荽，幾乎舖滿鍋頂！
隨着個湯滾，冬瓜片就會溶化，芫荽會散落四個鍋底中。超人即刻電影人上身，話如果攞嚟拍 video，再加快鏡，應該會好靚！
最後都要提一提，大家盡情享受芫荽香氣及當中的維生素和礦物質時，有些人是不適宜吃過量的芫荽。有中醫師指有口臭、臭狐的朋友，吃太多芫荽反而會令臭昧更濃。忠哥就即刻爛 gag 上身，話可以考慮外敷，夾兩塊芫荽喺腋下除臭 XD 唔知係咪真係有效呢？
好喇，今集分享到此為止，充滿笑聲的一集，節目重溫：
https://www.rthk.hk/radio/radio1/programme/happydaily/episode/604107
