2019年11月24日星期日

《試伏開箱》譚仔三哥雲南米線 - 五小辣薯片


一向比較少寫零食,試新嘢我又鍾意喎,咁就不如來一篇。




早前行過便利店,在零食架上見到「日清」出咗「譚仔三哥」五小辣薯片,$12 一包,$18 兩包。第一個條件反射係:伏唔伏㗎?



在此向海外讀者解說一吓。「譚仔」是香港的雲南米線食肆,有兩個品牌,一個叫「譚仔」,另一個叫「譚仔三哥」,是兄弟分裂出來變成的兩條 lines。在香港有不少朋友都是譚仔或三哥的粉絲,可以個個禮拜食都食唔厭,因為佢夠大眾化,價錢也不算貴。兩條 lines 最出名的,應該係米線有不同辣度選擇,同埋服務員大多是帶有「鄉音廣東話」的阿姐 (沒歧視成分,部分阿姐其實幾可愛搞笑)。


(圖片來源:譚仔三哥 Facebook) 

薯片包裝上也有介紹「譚仔三哥」,原來係米芝蓮,我都忘記了:



薯片與雲南米線,可以話大纜都扯唔埋。不過咁,估計佔香港雲南米綫市場達7成的「譚仔」和「譚仔三哥」,在 2017 年被「日本丸龜製麵母企日本東利多控股」全面收購,涉及約 108家分店,變成攞咗日本 passport。而大家都唔陌生的「日清」,是「日清食品株式會社」旗下的日本食品集團。想深一層,兩者來一個 crossover,背後又好像有些合理。

上網查資料,原來「日清」今次叫做食「兩家茶禮」,一次過推出「日清湖池屋」譚仔雲南米線,同譚仔三哥米線辣味薯片 (譚仔是「麻辣三小辣」厚切薯片,三哥米線「煳辣味」辣度就直接上升到五小辣):


(相片來源:新假期)

我一向食「譚仔」(沒有三哥) 的品牌比較多,不過既然緣份來到俾我碰到佢,咁就買左包試吓,睇吓真係伏唔伏。。。

一打開包薯片⋯⋯先係無乜椒麻香味:



食幾塊,辣味竟然係相當淡,近乎零,完全不像五少辣,也別奢想有甚麼回甘麻感。。。



整體完全失望。以我理解,「煳辣味」是譚仔三哥獨創,今次的 crossover 可以話係失敗,帶唔出當中的神韻,只是一包普通鹹昧薯片,用個 gimmick 去吸引人買。個人覺得卡樂B的咖喱味同熱浪薯片,仲好食同仲辣。

若果你是「譚仔三哥」的粉絲,又想食辣,結論係可以考慮慳返唔使買。其實會唔會出「土匪雞翼」味,與薯片會更加夾呢???


是日試伏開箱,報告完畢!




若你喜歡此部落格,也請你 like 一 like,感激!

沒有留言:

發佈留言

Related Posts Plugin for WordPress, Blogger...