龍少爺 : 老馬有火：麥兆記雲呑麵

2019年1月30日星期三

利申，食雲呑麵，我個人喜好是「何洪記」，它的「乾炒牛河」配余均益辣醬也是一絕。間唔中經過中環威靈頓街，口痕都會食碗「麥奀記」。

老字號雲吞麵，「散尾金魚」狀的雲呑要依足傳統方法弄製，墊於銀絲麵底內，一口一粒，鮮蝦味道濃郁；湯底要用上大地魚及蝦殼等熬製，更是整碗雲吞麵的靈魂，方為上品。

咁所謂老字號雲吞麵店，在港多的是，索價也可以不菲，尢其「麥」字派一系列各店。

話說某週五黃昏在跑馬地有個 social event 要出席，之前想食啲嘢打打底，和同行女友人隨便入了「麥兆記」食碗快麵。

見到門口貼出某名女DJ 的食評，俾咗「甲」，我即刻心諗，咁即係唔慌好啦。。。

時間大約是 5:15pm，店內人客不多，侍應們甚空閒在聊天。我們坐底即刻落單，因為趕時間，只要了一碗細蓉及一碗水餃麵，最大路，落單時說了「快馬」。

我諗前後等左15分鐘，都未上食物，侍應們繼續閒話家常。。。我們就追問一下。

「係咁㗎啦，我哋啲雲吞幾十年來，都係即叫即淥！」以下呢位阿姐侍應邊 bear 著我們邊答。我還以為我講錯了什麼，果然老馬有火。。。

咁咪即係唔識與時並進囉。若果在中午人多的時候，係咪都係咁十年如一日的古舊做法？！不論是否趕時間，我想信有樣野叫「合理期待」。你跟傳統半粒鐘整一碗麵都得，是否「合理期待」？明事理的讀者們應該理解。

「雲呑麵」$46 +10%

印象中以前它的雲呑麵都能做到基本的蝦爽，湯鮮。今次湯底明顯多了味精，而且因為食得太趕，俾阿姐搞到冇乜心情食。

「水餃麵」$50 +10%

埋單時阿姐面口也不太好，我覺得整體是態度問題。真心一問，查實呢啲老店，係咪真係以為自己好巴閉？

一間食肆給人的印象，很影響人客會不會再吃它的出品，若然印象好，食客多，happy 之餘價錢又可賣貴一點，口碑好，這該是經濟學上所謂的建立「goodwill」本錢。故步自封？恐怕遲早會俾人淘汰，難怪在某網上食評，此食店有咁多嬲嬲豬。

「麥兆記 (袓傳) 廣州雲吞麵」

地址 : 跑馬地景光街32號地下

電話：2893 2308

營業時間：11:00-23:30

若你喜歡此部落格，也請你 like 一 like，感激！