2017年11月1日星期三

2017-11-03 十六座車仔麵:清甜無渣炆蘿蔔


因為逐漸失去,所以想要留住。




近年愈來愈多餐廳走懷舊路線,重回昔日時光。上星期去了先達整我部 iPhone 個相機鏡頭 (係,又壞。。。),見對面有間「十六座車仔麵」,樓高兩層,店內裝潢重現香港人的屋邨年代,加入大家熟悉的元素,地方乾淨企理,把地踎風格玩得玩味十足,即管白撞食碗麵,邊食邊等電話修理好。




這一排過落座的吧枱,透明玻璃櫃中放了家庭常見的藍邊米通碗,阿婆必備的筷子筒,餐牌放入灰色傳統鐵信箱中,總有一款大家見過?!


廁所門就是屋邨的經典門口,不忘以揮春門神裝飾,中間再放多個信箱。今次不怕入錯男女廁,反倒以為入錯別人家門口。


鐵閘前搭起一個個汽水箱,舊式佈置:



半開放式廚房,可以從吧櫃與牆身中間,看到師傅們在煮麵:


外面掛上的食物的牌子,似足以前篤牛雜的大牌檔:



九因歌不是真 • 九因歌,而是餐廳提供的九款食物:


餐廳最平的懷舊四品麵餐,$38 指定蘿蔔、魚蛋、豬紅、紅腸四餸。我吃車仔麵的心得,是一定不會點紅腸、午餐肉等食物,相反一定要吃由廚房煮的,才能吃到師傅實力。


我點了這個︰油麵底,配豬紅、蘿蔔、滷水大腸、雞翼尖,還有新嘗試的牛舌芯,五餸麵 $59



車仔麵拎到上枱,竟然這樣大盤,麵底是平時吃的 1.5倍,各種配料都不慳皮,大腸份量多,一份雞翼尖也的有6-7隻:



食拿喳麵最經典,當然是食神史提芬周逐樣配料挑剔,蘿蔔無揀過有渣、豬紅一夾就散,都是失敗。。。



今次吃的是沒有可挑剔,蘿蔔清甜無渣,炆得透,用冰糖炆,非常值得推介!至於我平時少食的豬紅,也沒有怪味,質地滑溜,像搽過 SKII 神仙水,一咬舌頭一推,就差不多要直入喉咽。。。


牛舌芯是牛舌中間部份,材料上比起食豬頸肉好像健康d?!



溫提,這裡的辣度都幾勁,我點中辣,已經令平時食得辣的我流晒鼻水。。。



另外點了一份少吃到的蝴蝶腩$30。



牛腩舖有蝴蝶腩賣,連筋帶肉,折開時似張翼的蝴蝶。因為肉比較薄易入口,又爽口,比牛腩軟腍,所以好多牛腩鋪通常都會留給熟客。



腩肉靚料, 吃得到蝴蝶腩的筋膜,炆得入味。可能因為是新店,滷水底始終需要時日,才會更成熟。

很多餐廳以啅頭蓋過一齊,把環境做得「打咭able」,卻忽略食物質素。有時又會覺得車仔麵間間差不多,吃不出分別,此「十六座車仔麵」的食物質素出奇地好,而且食物標榜無味精,此點對我非常重要,不會食完口渴到唱「熱情的沙漠」,抵讚。




「十六座車仔麵」
地址︰旺角通菜街103號地舖
電話︰2341 6759
營業時間︰11:30-02:00



若你喜歡此部落格,也請你 like 一 like,感激!

沒有留言:

發佈留言

Related Posts Plugin for WordPress, Blogger...