工作日子飲食花絮，第十七集來一篇中午在 office 吃外賣的集合吧，價錢有些忘記了，通常計埋平台費，我想大概是 HK$100 +/- 左右一餐吧 ? ! 中、西、韓、日、越菜乜都有。
近排一係天氣極端酷熱，一係就成個月係咁落雨，真係唔想出去日曬雨淋，沒 business lunch 的話就和同事集體叫外賣就變左恆常。
我和一位台灣同事，她很喜歡吃港式五香牛腩那一類的東西，而且她也頗有要求，常常嚷着要吃「米芝蓮必比登」推介的「靠得住」出品，那就和她一起點。
「靠得住」在 2011至2017年曾獲「米芝蓮推介食肆」榮譽，是香港首間獲得米芝蓮系列推薦的粥品食肆，我喜歡吃這餐廳的粥，不過在辦公室吃飯第一個守則係盡量乾淨企理，第二係唔使食到成頭大汗咁肉酸，所以通常會叫「牛筋腩撈麵」，食咗好多餐。。。
另外又會叫一盒「淨牛筋腩」同佢一齊 share，大食大癲，美味的，卻會飽到上心口！
食厭咗牛筋腩會食「豬手撈麵」，呢啲屋企唔會整，出外食最好：
小食「沙薑雞腳」都 dope :
台灣同事真係好鍾意食牛，有時就陪佢一齊點港式「牛坑腩」，加個淨「韭菜餃」 share :
除咗牛，我本身很喜歡吃雞肉，十幾年前有幫襯灣仔的「榮式燒雞扒」，而家就變咗叫外賣，要多菜脯多蔥油撈飯，不過好老實講，塊燒雞扒已無以前咁好食，塊皮唔脆：
一盒兩塊燒雞扒其實都幾大份同味寡，將其中一塊做炸雞扒是個比較好的選擇：
佢有個小食叫「炸蓮藕肉餅」，試過完全唔得，太乾了，炸得唔好，可以慳返錢唔使加：
除咗雞扒，各式各樣海南雞飯、沙薑雞飯等等，如果無乜概念特別想食乜嘢就會點佢哋：
咁樣食法，有一排覺得自己肥到一個點，要 keep 番。。。中午就無咁重口味，食「Poke Green」的「加州風味碗」或「自選風味」要沙律菜底，真係食咗好多次，成為了我的外賣飯堂：
滿滿一盒有三文魚刺身、三文魚子、青瓜沙律、雞蛋絲、蕃茄等等，有時會 top up 半個牛油果，甚對我胃口，因為有三文魚子！同埋食飽都無咁有罪惡違和感。。。
若果要半飯底，記得叫佢加「鰹魚汁」，整體味道相當夾，不過食咁大盒係咪真係可以幫助到瘦身就不得而知啦 XD
如勁肚餓，都會加多個小食，兩款「炸雞塊」
「炸吉列日本廣島蠔」都是我的心水，咁樣加吓加吓今餐應該 HK$150＋吧：
有段時間真係的起心肝減肥，起碼瘦返塊面先啦！咁就會中午去「Grove Cafe」買沙律食：
「牛油果煙三文魚南瓜蔬菜油醋汁沙律」，你話係咪好好食？我肯定答你不是，淨係食冷冰冰蔬菜都食到懷疑人生。。。所以都唔會堅持到好耐，haha : )
反而呢個「巴馬火腿蜜瓜火箭菜沙律」，作為「火腿控」，我會堅持到喎，那排係有瘦返喲：
若想食啲熱辣辣嘢，有時會幫襯越南餐廳。雖然想食 Pho，不過堅守第一個乾淨企理原則，唔想要咁多湯汁食到污糟邋遢，我就會叫「越式燒豬頸肉加太陽蛋飯」
在我心目中太陽蛋是主角，也是我的 comfort food 之一，中午放飯見到太陽蛋都開心嘅，撈飯一流：
有次佢俾咗個全熟煎蛋俾我，見到心情即刻一沉，食物真係可以影響一個人的喜怒哀樂！
另一間越式餐廳的外賣沒有太陽蛋的「烤豬頸肉飯」又係即刻跌晒 watt，配「越式炸春卷」，春卷鬆化比乾爭爭的豬頸肉更好吃：
又係豬頸肉，今次係泰式拼海南雞，記得呢個係好趕時間又要食得好快之下嘅選擇，快快手一餐咁囉：
興起食韓國便當的話，會叫「韓米」，勝在一盒乾乾淨淨，「辣泡菜炒豬肉便當」配「韓式魚片蘿蔔湯」
便當似個「飛機餐」，一格一架擺好晒齊齊整整，有主菜、小食餃子、紫菜卷等等，惹味，唔錯：
日本代表就有這個「厚燒牛脷便當」，來到時溫泉蛋已面目全非，牛脷亦凍咗，明白送外賣員趕時間的辛苦。想食好啲嘅日本嘢都係乖乖哋去返餐廳光顧：
日系代表仲有牛肉飯，「すき家」的「秋葵牛肉飯」，我非常喜歡吃秋葵，含豐富膳食纖維同埋維他命 A，也不算貴：
佢個「炸雞柳」過吓口癮都唔錯：
另一系列經常食嘅就係「焗飯」，通常不會差到哪裏，「焗豬扒飯」、「焗葡國雞飯」等等等等，唔同茶餐廳、快餐店都叫過，都係趕時間之下叫做不錯的選擇：
以下呢兩個應該係港式系列？有時我都會叫「譚仔米線」外賣，唔係鍾意食米線，而係鍾意食佢個「羅漢素菜煎腐皮卷」，好似 HK$13 一嚿。我都會叫得幾瘋狂，剩係食呢個腐皮卷已滿足，其他餸料全走 XD
另一個大家一定會食過嘅就係香港 This This Rice，即係兩餸飯，亦都係我最不喜歡的。呢個通常係搭同事幫我買埋，咁借個方便，我也不能要求太多：
餸菜離不開炒蛋、雞扒、蘿蔔牛腩、炒西蘭花嗰啲，不喜歡是通常調味太重及很有味精感，咁我本身有「味精敏感症」，有時食完會堅・口渴同皮膚短暫痕癢，少吃為妙：
聊完午餐不如講吓平時上班吃什麼早餐，答案是便利店買的各款三文治，小食及豆漿，或者有時買隻香蕉食。以下呢隻香港製造出產嘅豆漿，是網上有朋友仔推介，其貌不揚不過味道不錯，有少糖版本，建議大家不妨一試：
講咗咁多，今集清咗好多手機裏面嘅相，亦都比大家了解吓作為打工人在辦公室上班中午無 business lunch，外賣就係食呢啲，下集不如講吓中午出去食嘅特輯，分享一下點滴。
最後開心送隻燒乳豬俾大家，點解會有？喜慶囉，let's celebrate ! 😊
沒有留言:
發佈留言