上回講到廿多年前的舊老細 Q先生由外國回港，約會舊日一班分行同事，人少少吃中午飯 (相關文章 廿年人事幾番新！(上) )
今回仲勁，謝謝 Q先生聯繫返大家，竟然約得返共10個舊同事出來吃晚飯敘舊，地點就在以前灣仔分行的附近：
其實人一生有幾多個廿四年？可能約三至四個吧！廿四年前小弟初出茅廬 (當年仲係四眼烏龜樣 🙈)，就係同在座呢班舊同事一起在分行工作，真係無諗過咁多年後可以咁齊人約得返出嚟食飯 ，好多位都好耐無見，難以致信的 reunion！
成餐飯食咩都唔重要，淨係重溫舊相、講返當年工作趣事已可以傾足成晚，笑到碌地！各位女士們都仲 keep得好好啊。其實想深一層，我們這裏10個人可能已經可以足夠開返一間銀行分行 😂
講返呢餐飯，揀咗灣仔食粵菜，環境闊落，枱與枱之間有足夠空間，坐得舒服，傾計唔使就住就住，也比較容易合大家胃口。今次一行人叫咗十二道菜，由燒味、小炒到煲仔菜都有，來分享一下：
「碳燒西班牙黑豚肉叉燒」HK$188
肉質鬆化帶油脂香，碳燒做法令邊位微焦，帶少許燶邊效果，蜜汁均勻掛面，不會過甜：
瘦肉部分不乾，肥膏位爽口不油膩，我會歸類為一個穩陣的叉燒：
「瑤柱貴妃雞」HK$138
雞有做到皮爽肉滑，滲出淡淡雞香，相信這雪藏雞有過下功夫弄製：
點少少蔥蓉已很夠味，肉質處理得啱啱好，不錯：
多人就來一鍋熱湯吧！「花膠響螺燉雞湯」HK$228
睇住阿姐現場拿出來，都頗真材實料：
湯的味精感不強，響螺帶來天然鹹鮮，雞肉燉到腍身，飲完甚窩心：
「滬江素鵝」HK$58
是用炸的形式處理。腐皮住素菜餡料，再將外層酥炸至金黃香脆：
入面的木耳、紅蘿蔔絲、冬菇保持爽口，腐皮也出奇地沒油很乾身，蘸點喼汁作為前菜很不錯：
「啫啫唐生菜煲」HK$128
上枱時沒有「滋滋」聲，像個洩了氣的氣球，這個有點失望。。。不過成煲都仍然相當熱辣，唐生菜經過蝦醬的洗禮，半爽脆之餘清甜很惹味，也沒有過鹹，調味仍是好的：
「脆皮咕嚕蝦球」HK$168
咕嚕肉變奏版，改用蝦球。蝦球大隻爽彈，脆皮炸得薄脆，掛滿酸甜汁；
汁醬酸甜平衡不嗆喉，新鮮菠蘿都好吃：
「姬松茸遼參豆腐煲」HK$138
我非常喜歡這道，最 dope！炆遼參切件爽滑帶彈性，姬松茸香氣突出：
豆腐吸收菇菌同炆海參精華，汁醬濃稠鹹香，送飯神器，有驚喜：
「豉汁帶子蒸豆腐」HK$168
在場多女士就叫過清蒸餸，俾各位清新一下。帶子肉厚度像五蚊銀厚，okay 的蒸得啱啱熟，沒有過老：
豆腐非常嫩滑，墊底索晒豉汁香，汁調味帶少少甜，甚恰到好處：
「黑椒牛仔骨煲」HK$128
牛仔骨的肉有些韌，黑椒汁濃郁帶微辣，調味反而不錯：
洋蔥、青椒等料頭墊底，用來索黑椒汁，煲仔上枱到食完還能保持熱度，這個有加分：
「XO醬鮮淮山炒蝦球」HK$148
蝦球同樣大隻爽口，鮮淮山切片爽脆，整體口感具層次：
XO醬鹹香微辣，色彩配搭清爽，合格：
「鮮茄雲耳勝瓜浸魚肚」HK$118
魚肚發得軟滑，吸收番茄湯甜味。勝瓜清甜，雲耳爽口，成道菜清淡得東有鮮味，湯底可以當湯飲：
最後來個「石鍋鮑魚雞粒飯」HK$138
石鍋上枱時仲滾緊，飯粒分明帶焦香，鮑魚粒夠腍，雞粒嫩滑，汁醬均勻包裹飯粒，完美的尾菜：
這餐整體大家都覺滿意，菜式選擇多，由傳統燒味到手工小炒都不錯，也沒有硬推銷我們吃貴價菜。用料頗新鮮，調味偏向傳統粵菜風格，不會太花巧，晚飯人均 HK$200，價錢在灣仔地段嚟講合理，環境清靜也很適合大夥兒傾計敘舊。
都係嗰句，食咩唔重要，知道現在各人近況安好就好了！多謝你們曾和小弟走過我成長的經歷，非常珍惜這四分一世紀的友誼，大家繼續一起加油，㊗️ 各人身體健康，日日都咁開心，期待下次再聚！
沒有留言:
發佈留言